Problemi 25 vjeçar i pronave, Rama:
Ne e futëm në rrugën e zgjidhjes reale

Nga dita e nesërme do të nis punën Agjencia e re e Trajtimit të Pronës dhe njëherazi lëvrimi me përparësi i 24 milionë dollarëve të parë. Kjo është bërë e ditur nga Kryeministri i vendit, Edi Rama i cili teksa ka shkruar në rrjetin e tij social “Facebook” ka shtuar se, 26 mijë dosje tashmë do të vlerësohen me një çmim.

Ai ka shtuar se, 23 mijë hektarë tokë bujqësore është vënë në dispozion të tyre, ku deri tani kanë aplikuar 11 mijë qytetarë për kthimin e pronave të tyre dhe nga nesër do të kenë informacion publik në faqen zyrtare online të Agjencisë së re të Trajtimit të Pronës.

Rama ka theksuar se qytetarët nuk duhet më të paraqesin 30 letra, por vetëm dy për tu përfshirë në këtë proces, pas të cilave Agjencinë e Trajtimin të Pronës do të verifikojë gjithçka.
 
Ja statusi i Ramës në Facebook
NË RRUGËN E ZGJIDHJES REALE TË PROBLEMIT 25-VJEÇAR TË PRONËS
Nesër, në orën 08:00, nis punën Agjencia e re e Trajtimit të Pronës. Fillon lëvrimi me përparësi i 24 milionë dollarëve të parë, - shumë e pakrahasueshme me buxhetin e viteve të shkuara - si fond për kompensimin e pronave.
26 mijë vendime, të dhëna ndër vite të tëra me radhë nga Agjencia e Kompensimit të Pronave dhe të bëra kapicë në labirinthin e padrejtësive e të korrupsionit me pronën, do të vlerësohen me një çmim.
23 mijë hektarë tokë bujqësore është në dispozicion si fond kompensimi fizik për të gjithë ata pronarë, toka e të cilëve është e zënë.
11 mijë qytetarë të Republikës së Shqipërisë që kanë aplikuar dhe janë zvarritur ndër vite për pronën e tyre, nga nesër do të kenë informacion publik në faqen zyrtare online të Agjencisë së re të Trajtimit të Pronës.
Për të gjithë ata të cilët për një arsye a një tjetër, nuk kanë pasur mundësi të aplikojnë për pronën e tyre, është krijuar një mundësi e re: Një kërkesë me vetëm dy letra. Dy letra nga 30 që kërkoheshin deri më sot! Një dokument origjine dhe një hartë e pretenduar se ku gjendet prona.
Në momentin që paraqiten këto dy letra dhe një kërkesë në Agjencinë e Trajtimin të Pronës, është barra e kësaj Agjencie, të verifikojë gjithçka duhet.
Për herë të parë pas 25 vitesh, qeveria jep një zgjidhje reale për pronarët. Kjo zgjidhje bën të mundur njëherë e mirë sqarimin e çështjes së pronës dhe mbrojtjen e interesave publike, gjithashtu.
Dhe në fund, për të gjithë ata shtetas, prona e të cilëve është e zënë nga ndërtimet pa leje, duke nisur nga nesër fillon kompensimi financiar.
Ky ështe ligji i ri i pronave. Këto jane vendimet e qeverisë që punon papushim për të ndërtuar rrugën e re drejt Shqipërisë së Gjeneratës Tjetër.

Redaksia Online
(F.T/shqiptarja.com)