Procedura e re, Biometriket
tani vërtetim dhe nga policia

TIRANE-Procedurat për nxjerrjen e pasaportës biometrike, komplikohen edhe më shumë,duke përfshirë tashmë si dikur edhe një formular të lëshuar nga policia e shtetit. Dje ministria e Brendshme, me propozim të Drejtorisë së Përgjithshme të Policisë së Shtetit, ka nxjerrë një udhëzim të ri: "Mbi procedurat e pajisjes me pasaportë biometrike, të shtetasve shqiptarë".

Nëpërmjet një njoftimi zyrtar për mediat, ministria e Brendshme, bën të ditur se "shtetasit shqiptarë, që aplikojnë për pasaportë biometrike për çdo herë, duhet të pajisen me formular identifikimi, me fotografi nga komisariati i policisë ku kanë vendbanimin, i cili plotësohet në dy kopje. Formulari i identifikimit miratohet me urdhër të Drejtorit të Përgjithshëm të Policisë së Shtetit. Kopje e formularit të plotësuar dhe të verifikuar nga policia, i paraqitet punonjësit të gjendjes civile pranë zyrës së aplikimit".

Kjo masë e re është vendosur pas indentifikimit kohët e fundit të shumë pasaportave biometrike të lëshuara për persona në kërkim, apo të falsifikuara edhe nëpër zyrat e kompanisë që i prodhon ato.Sipas policisë, në shumë vende të europës, policitë homologe kanë ndaluar mjaft persona, kryesisht kosovarë të paisur me pasaporta biometrike shqiptare që nuk rezultojnë në sistemin e policisë. Rifutja në "lojë" pas kaq vitesh e formularit të policisë, do të rreptësojë abuzimin që bëhet me pasportat biometrike, sidomos pas liberalizimit të vizave. Por nga ana tjetër do të zgjasë kohën që duhet për marrjen e saj.
(shqiptarja.com)