Procesi, deri tani i bllokuar për
çështje financiare dhe ligjore

Procesi i dixhitalizimit të programeve televizive, një detyrim i Shqipërisë ndaj BE, që duhet të përfundojë më 17 qershor të këtij viti, rezulton prej kohësh i bllokuar. Radiotelevizioni Shqiptar, nëpërmjet një shkrese drejtuar ministres Milena Harito, ka bërë me dije se ai, me të ardhurat e veta, nga taksa televizive dhe fondet buxhetore, që konsiderohen si të ardhura të sigurta, mund të garantojë projektin vetëm në rast se palët bien dakord për një shtyrje të pagesave për fazën e dytë të projektit në një periudhë 10-vjeçare, nga viti 2015 deri në vitin 2024.

Problemi i dytë ka të bëjë me faktin se çdo material e pajisje që hyn në Republikën e Shqipërisë është subjekt i pagesës së Tatimit mbi Vlerën e Shtuar dhe taksave të ndryshme doganore. Të gjitha këto, në total, do të përbënin një shumë prej 4 milionë eurosh, sipas llogaritjeve të kompanisë fituese të tenderit për dixhitalizimin. As RTSH dhe as kompania fituese Rohde&Schëartz s’kanë pranuar të paguajnë këto detyrime.

Për ministrinë e Financave, legjislacioni fiskal në fuqi nuk parashikon përjashtime nga taksat dhe tatimet për furnizime mallrash, edhe në rastin kur fjala është për projekte të institucioneve buxhetore. Për qeverinë, është e detyrueshme që TVSH dhe taksat e ndryshme doganore të paguhen. Nga ana tjetër, edhe Financat konstatojnë se RTSH ka fuqi financiare vetëm për të mbuluar fazën e parë të projektit.

RTSH propozon që ose e gjithë shuma të mbulohet që në fillim me garanci qeveritare, që do të shlyhej gradualisht nga Radiotelevizioni (21.6 mln euro), ose 12 milionë euro të garantoheshin për fazën e parë dhe 9 milionë për fazën e dytë. Në pritje të zgjidhjes së këtyre pengesave, procesi mbetet ende larg nga realizimi.

Shkrimi u botua ne gazeten shqiptarja.com

Redakisa online
(f.i/Shqiptarja.com)