U mbajt ditën e sotme në Tiranë konferenca e nisjes së Thirrjes së dytë për përzgjedhjen e projekteve të Programit të Konvertimit të Borxhit Italo-Shqiptar (IADSA II). Programi i Bashkëpunimit dhe Zhvillimit Italo-Shqiptar përfshin një instrument inovativ financimi, Programin e Konvertimit të Borxhit për Zhvillim (IADSA), e cila ka për qëllim të mbështesë zbatimin e projekteve në sektorin social, propozuar nga institucionet përkatëse Publike Shqiptare dhe të seleksionuar bashkërisht nga të dyja palët në kuadrin e Programit Italo-Shqiptar të Asistencës për Zhvillim.
Të pranishëm në konferencën e sotme ishin ambasador italian në Shqipëri Fabrizio Bucci, Përfaqësuesja e AICS, Stefania Vizzaccaro, ministrja shqiptare të Ekonomisë dhe Financave Delina Ibrahimaj, Drejtori i Agjencisë Shqiptare për Koordinimin e Donatorëve (SASPAC), Ilir Beqaj dhe dy bashkëdrejtorët e Njësisë Teknike të Mbështetjes së IADSA, Basilio Toth dhe Ismail Ademi.
Gara aktuale synon të mbështesë nismat e promovuara nga institucionet publike shqiptare në përputhje me strategjitë dhe prioritetet kombëtare për zhvillim dhe integrim të formuluara nga Qeveria Shqiptare, si dhe me Programin e Bashkëpunimit për Zhvillim ndërmjet Italisë dhe Shqipërisë. Projektet mund të realizohen në bashkëpunim me organizata jofitimprurëse shqiptare dhe italiane, institucionet lokale italiane, universitete italiane apo shqiptare.
![](https://shqiptarja.com/template/img/NO_ALFA_Kuadrate shqiptarja.png)
Janë të pranueshme nismat që kanë të bëjnë me këto fusha prioritare të ndërhyrjes: arsimi gjithëpërfshirës dhe cilësor, shërbimet shëndetësore publike dhe mjekësia parandaluese, shërbimet e asistencës sociale për personat në vështirësi, përfshirja sociale e subjekteve vulnerabël, zhvillimi i qëndrueshëm territorial, rritja e turizmit dhe kulturës shqiptare, menaxhim më i mirë i mbetjeve urbane, ndërgjegjësim për përdorimin e energjive të rinovueshme, promovim i zhvillimit bujqësor dhe zgjidhje inovative për zonat e mbrojtura dhe ekosistemet e brishta.
Projektet përzgjidhen përmes thirrjes specifike të publikuara më 20 mars 2023 në faqen e internetit të IADSA. Afati i fundit për dorëzimin e projekt propozimeve është 22 maj 2023 ora 12:00.
Konferenca ishte e hapur për përfaqësues të institucioneve publike shqiptare, OJQ-ve italiane dhe shqiptare, subjekteve territoriale italiane dhe organizatave ndërkombëtare që operojnë në Shqipëri.
Gjatë prezantimit para gazetarëve dhe publikut, Ambasadori i Italisë Fabrizio Bucci nënvizoi suksesin që Programi IADSA ka arritur të grumbullojë ndër vite, i karakterizuar nga ndërhyrje me ndikime konkrete në zgjidhjen e problemeve reale të qytetarisë. IADSA përfaqëson gjithashtu një shembull të shkëlqyer të punës ekipore italo-shqiptare.
Përfaqësuesja e Agjencisë Italiane për Bashkëpunim Zhvillimor në Ballkanin Perëndimor, Stefania Vizzaccaro, nga ana e saj theksoi rëndësinë e bashkëpunimit të përfaqësuar nga IADSA, objektivi i së cilës mbetet "të mos lërë askënd pas". Thirrja e dytë e IADSA prezanton disa risi, duke përfshirë projekte nga 400 deri në 500 mijë euro, bashkëfinancim për aplikantët kryesorë, universitetet si partnerë, komunat si aplikonte kryesorë apo si partnerë, Axhenda e Gjelbër për Ballkanin Perëndimor.
Ministrja e Ekonomisë dhe Financave e Shqipërisë, Delina Ibrahimaj u shpreh se IADSA është ndoshta jo shumë e dukshme, por e rëndësishme për zhvillimin social, barazinë sociale, kategoritë e pafavorizuara dhe zonat më të thella, në përputhje të plotë me politikat e zhvillimit të Shqipërisë.
Drejtori i Agjencisë Shqiptare për Koordinimin e Donatorëve (SASPAC), Ilir Beqaj kujtoi se, edhe në bazë t përvojës së tij, IADSA ka qenë prej vitesh një nga programet më të mira që Shqipëria ka pasur në tridhjetë vitet e fundit. Si ministri ashtu edhe drejtori kanë shprehur shpresën se kjo nuk do të jetë thirrja e fundit e IADSA-s në vend.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)