Komisioni i Venecias ka njoftuar se Kryetari i Kuvendit të Shqipërisë, Niko Peleshi, i është drejtuar zyrtarisht me një kërkesë për opinion mbi projektligjin “Për financimin e partive politike”.

Sipas njoftimit, me anë të letrës së datës 27 prill 2026, Peleshi ka kërkuar vlerësimin e Komisionit të Venecias lidhur me këtë projektligj, i cili synon rregullimin e kuadrit ligjor për financimin e subjekteve politike në Shqipëri.

Projekt-opinioni pritet të diskutohet dhe të miratohet në Sesionin e 147-të Plenar të Komisionit të Venecias, që do të zhvillohet më 12–13 qershor 2026.

Kërkesa e Niko Peleshit drejtuar Komisionit të Venecias: 

REPUBLIKA E SHQIPËRISË

KUVENDI

KRYETARI

Prot. nr. 1842

Tiranë, më 27.04.2026

Lënda: Kërkesë për opinion mbi projektligjin “Për Financimin e Partive Politike”

E nderuar Zonja Presidente,

Në emër të Kuvendit të Republikës së Shqipërisë dhe në cilësinë time si Kryetar i Kuvendit, dëshiroj të shpreh vlerësimin tim të sinqertë për kontributin e vazhdueshëm dhe të vyer të Komisionit të Venecias në forcimin e institucioneve demokratike, konsolidimin e shtetit të së drejtës dhe avancimin e proceseve zgjedhore në Republikën e Shqipërisë. Ekspertiza dhe udhëzimet e Komisionit kanë qenë dhe vijojnë të jenë thelbësore për të garantuar që reformat legjislative të jenë në përputhje me standardet ndërkombëtare dhe praktikat më të mira.

Në kuadër të bashkëpunimit tonë të vazhdueshëm dhe në vijim të punës së Komisionit të Posaçëm Parlamentar për Reformën Zgjedhore — i mandatuar për të propozuar ndryshimet e nevojshme legjislative në fushën e reformës zgjedhore — dëshiroj t’ju informoj se Komisioni ka përgatitur projektligjin me titull “Për Financimin e Partive Politike”. Ky projektligj synon të adresojë rekomandimet e përcaktuara në raportet e OSBE/ODIHR-it, duke përfshirë gjithashtu standardet dhe praktikat më të mira ndërkombëtare në fushat e transparencës, mbikëqyrjes dhe rregullimit të financimit të partive politike.

Në dritën e sa më sipër, kam nderin t’ju përcjell bashkëlidhur projektligjin e sipërpërmendur dhe t’ju ftoj me mirësi që Komisioni i Venecias të japë opinionin e tij. Do të vlerësonim shumë çdo koment, rekomandim apo vërejtje që mund ta konsideroni të përshtatshme. Kontributi juaj do të kishte rëndësi të veçantë për përmirësimin e mëtejshëm të projektligjit dhe garantimin e përputhshmërisë së plotë të tij me standardet ndërkombëtare dhe praktikat më të mira.

Ju falënderoj paraprakisht për bashkëpunimin dhe mbështetjen tuaj të vazhdueshme dhe pres me interes marrjen e opinionit tuaj të çmuar mbi këtë çështje.

Niko PELESHI

Znj. Claire Bazy-Malaurie

Presidente e Komisionit të Venecias

Këshilli i Europës

Drafti i dakordësuar mes dy forcave më të mëdha politike parashikon një sërë ndalimesh se kush nuk mund të dhurojë para për partitë, duke përfshirë të gjitha kompanitë që kanë kontrata koncesioni, apo PPP.

Para nuk lejohet që forcat politike të marrin nga institucionet qeveritare ose joqeveritare të huaja, biznese dhe persona fizikë të huaj, dhuruesit anonim; bizneset e lojërave të fatit apo në fushën e kriptomonedhave; organizatat joqeveritare, humanitare, fetare apo sindikale.  Edhe të dënuarit për korrupsion, pastrim parash, krim të organizuar apo trafikimit droge e krime zgjedhore nuk lejohet të kontribuojnë para në partitë politike.

Projektligji përcakton qartë që qytetarët e thjeshtë mund të dhurojnë për partinë deri në 200 mijë lekë në një vit, ndërsa personat që kanë një NIPT deri në 500 mijë lekë, dhe kompanitë deri në 1 milionë lekë për një vit.

Në momentin e dhurimit, të gjithë duhet të nënshkruajë një deklaratë, ku konfirmojnë se nuk ndodhet në kushtet e ndaluara nga ligji dhe mban përgjegjësi personale për çdo deklarim të rremë.

Projektligji parashikon që paratë e buxhetit të shtetit për partitë politike të shpërndahen përmes një Fondi Publik Vjetor, i cili nuk mund të jetë më i ulët se ai i vitit paraardhës në vitet jozgjedhore. Shpërndarja bëhet sipas performancës elektorale, 70% sipas numrit të deputetëve, 20% në mënyrë të barabartë për partitë parlamentare dhe ato me mbi 10 mijë vota, dhe 10% sipas përqindjes së votave për partitë mbi 1%. Paratë nga buxheti i shtetit jepen vetëm për partitë që dorëzojnë raport financiar, ndërsa një grant shtesë 5% ndahet për ato që promovojnë barazinë gjinore dhe përfshirjen e të rinjve.

Veç përfitimeve Partitë Politike pritet të përballen me gjoba milionëshe nëse shkelin ligjin dhe nuk dorëzojnë në kohë raportet financiare.