TIRANE-  Prokurori i Durrësit Dritan Gina padit në Gjykatë Ina Ramën pasi sipas tij ka shkelur ligjin gjatë Mbledhjes se Pergjithshme te Prokuroreve ku u zgjodhën dhe tre anëtarë të rinj anëtare të Keshillit të Prokurorisë së tre Drejtuesve të Prokurorive pranë Gjykatave të Rretheve Gjyqësore Tiranë, Durrës dhe Fier dhe konkretisht të Prokurorëve Sokol Malaj, Altin Binaj dhe Besnik Cani.
Prokurori i Durrësit i cili kandidonte vetë për një post të tillë shprehet se janë shkelur procedurat ligjore cka sipas tij u zhvillua nja garë e padrejtë dhe e kontrolluar nga Prokurorja e Përgjithshme Ina Rama.
Sipas Ginës Ina Rama thirri me vonesë mbledhjen e Këshillit të Prokurorëve duke mos u lënë kohën e mjaftueshme ligjore të gjithë kandidatëve të përgatiten për procesin.
«U njoftuam vetem 4 ditë para mbledhjes dhe jo 8 ditë sic parashikon ligji » shkruan ne padinë e tij Gina ndaj Ina Ramës.
Sipas Ginës në kundërshtim flagrant me ligjin Ina Rama favorizoi kandidatët fitues duke mos garantuar barazinë e statusit të kandidatëve të tjerë në këtë garë.
Ai kundërshton gjithashtu dhe “kontrollin” e këtij procesi nga ana e kryeprokurores duke marrë kompetencat që i jep ligji në këtë rast Drejtorisë së Inspektimit dhe të Burimeve Njerezore të Prokurorise se Pergjithshme që merret me procesin e verifikimit të kandidaturave.
Dhe ajo cka është më e rëndësishme sipas prokurorit të Durërsit Dritan Gina është fakti se Ina Rama lejoi zhvillimin e nje gare dhe konkurimi per te njejtin vend, ndermjet personave me pozita te pabarabarta, jo per shkak te meritës, por per shkak te pozicionit dhe detyrës. Sipas tij ligji përcakton qartë se tre anetaret e Keshillit te Prokurorise duhet te jenë Prokuror ne Prokuroritë pranë Gjykatave te Shkallës se parë dhe jo Drejtues të ketyre pokurorive sic ka ndodhur me të zgjedhurit.
Dritan Gina i kërkon Gjykatës pezullimin e vendimit për emërimin e trë anetarëve të Këshillit të Përgjithshëm të Prokurorisë deri në një vendim përfundimtar të kësaj gjykate.(ns/shqiptarja.com)