Prokuroria gati listën: Ja kush
do pyetet për vrasjen e Santos

TIRANE - Grupi i hetimit i drejtuar nga prokuroria e Tiranës për zbardhjen e vrasjes së biznesmenit 58-vjeçar Artan Santo, ka konkluduar listën e personave që do merren në pyetje në cilësinë e personave që mund të kenë dijeni për ngjarjen, konfliktet e biznesmenit, apo edhe të dyshuar për krimin. 

Sipas burimeve të A1Report, në listë janë bashkëpuntorët, ortakët dhe disa vartës të Santos, të cilët do të pyeten rreth marrëdhënieve të tyre me 58-vjeçarin, nëse ka patur konflikte me ta, apo nëse janë në dijeni të ndonjë konflikti mes tij dhe personave të tjerë. 

Veç katër prokurorëve të rrethit në hetim është përfshirë edhe prokurori I Task Forcë të Antikrimit Ekonomik, Ndini Tavani. 

Më herët nga zyra e Santos ishte sekuestruar kompjuteri i tij i punës dhe ai personal, ku do të shikohen të gjitha materialet apo e-mail që ka shkëmbyer për të parë nëse aty ka elementë që mund të ndihmojnë hetimin.

Ndërkohë, ditën e djeshme Kreu i SHISH Visho Ajazi Lika i ka dorëzuar kryeprokurorit Adriatik Lalla, një raport me informacionet dhe përgjimet që lidhen me zbardhjen e vrasjes së bankierit 58-vjeçar Artan Santo. Gazeta “Shqiptarja.com” ka mësuar se Lika ka marrë përsipër të sjellë informacionet që mund të kenë partnerët e huaj të shërbimeve sekrete, për të mësuar rreth problemeve që mund të ketë pasur bankieri shqiptare me bankierë të huaj, dhe jo vetëm.

Bankieri dhe botuesi i njohur Artan Santo, u qëllua për vdekje me armë zjarri nga 6 plumba, më 26 qershor nga dy persona të maskuar, pranë selisë qendrore të bankës "Credins", teksa ishte duke hyrë në institucion. 

Redaksia Online
(e.c/shqiptarja.com)

TAG:
• visho ajazi lika