Protesta e PD, zbardhet urdhri i
Bashës: Do bllokojmë Kuvendin

Kryetari i Partisë Demokratike ka urdhëruar deputetët e Tiranës në grupin parlamentar që të zbresin në terren për të ndihmuar kryetarët e degëve, me qëllim mobilizimin e njerëzve për protestën e 17 dhjetorit, përpara selisë së Kuvendit. Shqiptarja.com zbardh urdhrin e kreut të demokratëve lidhur me protestën e së enjtes. Në të thuhet që deputetët duhet të protestojnë jashtë Kuvendit, por edhe në foltore, duke paralajmëruar kështu edhe bllokimin e seancës.

Pas mbledhjes së aktivit kombëtar të PD një ditë më parë, ku u vendos për protestën e javës së ardhshme, Basha ka kërkuar angazhim maksimal nga deputetët.

Por kjo do të sjellë braktisjen e komisioneve parlamentare nga e hëna e deri të mërkurën, edhe pse pritet që të diskutohen projektligje të rëndësishme siç është ai i dekriminalizimit apo edhe projektbuxheti për vitin 2016.

Burime pranë PD thanë për “Shqiptarja.com” se nuk ka vendim politik për bojkotin e Kuvendit, por vetëm një shkëputje 3-ditore të deputetëve nga komisionet parlamentare, që do të thotë se prezenca e përfaqësuesve të opozitës do të jetë e reduktuar.

Nisur nga thirrjet e kryetarit demokrat, Lulzim Basha dhe ato të ish liderit Sali Berisha, për mosbindje civile paqësore, edhe bojkoti i Parlamentit është pikërisht një sjellje e kësaj natyre, por për momentin kjo nuk është në axhendën e demokratëve.

Nga ana tjetër, Partia Demokratike pret që mosbindjen civile ta nisin qytetarët.

Mosbindja civile paqësore nënkupton refuzimin e shlyerjes së taksave dhe tatimeve apo dhe refuzimi i pagesës së energjisë elektrike dhe tarifës së ujit të pijshëm.


Redaksia Online
(F.T/shqiptarja.com)