Protesta në Shkozë, Vasili-Ramës:
Fjalët e tua janë komedi e zezë

Kryetari i grupit të LSI, Petrit Vasili ka reaguar pas deklaratave të Ramës për banorët në Shkozë që protestojnë kundër shembjes së banesave për projektin e Lanës.
 
Sipas Vasilit, qëndrimi i tij është i egër e pa mëshirë edhe për fëmijët e Shkozës, që s'dinë se ku do të mësojnë dhe prindërit e tyre, që ndodhen përpara shkatërrimit pa kthim të djersës, gjakut dhe mundit shumëvjeçar.
 
STATUSI I PETRIT VASILIT
Kryeministri përbuz shqiptarët nga Amerika
 
Kryeministri Edi Rama ka folur për rastin e Shkozës gjatë një interviste në Zërin e Amerikës, këtë të premte.
 
“Shkoza s’përfaqëson asgjë dhe s’meriton besoj koment deri në Uashington dhe Nju Jork".
 
Këto tha ky kryeministër i egër me qytetarët dhe superficial e i paditur si në çdo gjë që bën e thotë.
 
Për Kryeministrin, që llomotit nga Uashingtoni, shqiptarët duken hiçgjë, të vegjël dhe të parëndësishëm, pasi ky e ndjen veten të rëndësishëm dhe është shumë i lumtur me vanitetin e tij social dhe politik, pasi gëzon i shkreti që ndodhet atje.
 
Reagimet demode të shkollëpakut, që vijnë erë kutërbuese provincializme, humnere idesh dhe gëzimi qesharak si ai i shqiptarëve kur dilnin jashtë shtetit para viteve 90', fjalët që thotë janë një komedi e zezë.
 
Ndaj, qytetarët janë të fundit për të, ndaj familjet e Shkozës që përballen sot me një hall e dhimbje të rëndë janë asgje përpara tij, ndaj dhe qëndrimi i tij është i egër e pa mëshirë edhe për femijët e Shkozës, që s'dinë se ku do të mësojnë dhe prindërit e tyre, që ndodhen përpara shkatërrimit pa kthim të djersës, gjakut dhe mundit shumëvjeçar.
 

 dy.b/shqiptarja.com