Protesta të dhunshme të fermerëve
grekë kundër reformës së pensioneve

Përleshje të dhunshme ndodhën në Athinë, mes fermerëve që protestojnë kundër taksave të reja dhe kundër reformës së pensioneve. Rreth 800 fermerë grekë që kishin mbërritur nga ishulli i Kretës për të marrë pjesë në protestën dy ditore në Athinë, goditën me domate, më pas gurë dhe shkopinj ndërtesën e Ministrisë së Bujqësisë, si dhe u vunë flakën kazanëve të mbeturinave, në rrugët kryesore të kryeqytetit grek.







​Si kundërpërgjigje forcat e rendit përdorën gazin lotësjellës. Ndërsa fermerë të tjerë kanë bllokuar autostradën pranë Korintit, madje disa prej tyre janë shprehur të gatshëm për të shkuar me traktorë në Athinë, e ndaluar kjo nga qeveria greke.

Kreditorët i kërkojnë qeverisë së Aleksis Cipras të rishikojë taksat për fermerët dhe të vijojë me reformën e pensioneve. Kundër kësaj reforme janë bashkuar mjekët, inxhinierët, ekonomistët, avokatët dhe artistët.





Në mbështetje të fermerëve kanë dalë edhe partitë opozitare.