Putin dhe Erdogan bisedojnë
në telefon, në fokus Siria 

Presidenti i Turqisë Recep Tayyip Erdoğan ka zhvilluar një bisedë telefonike me presidentin e Rusisë Vladimir Putin.
 
Burimet e presidencës bëjnë të ditur për Anadolu Agency se në bisedën telefonike mes Erdoğan dhe Putin, krahas marrëdhënieve dypalëshe, është diskutuar edhe për çështjet rajonale me në krye Sirinë.
 
Mësohet se Erdoğan dhe Putin kanë shkëmbyer mendime dhe informacione në lidhje me sulmin ndaj ushtarëve turq në operacionin që po zhvillohet në rajonin El Bab në kuadër të operacionit "Mburoja e Eufratit" dhe se kanë rënë dakord për përshpejtimin e përpjekjeve për gjetjen e zgjidhjes së krizës humanitare në Halep.
 
Erdoğan ka theksuar se operacioni "Mburoja e Eufratit" është tregues i vendosmërisë së Turqisë në luftën kundër terrorizmit dhe se mbështesin integritetin territorial të Sirisë.
 
Gjatë bisedës, dy liderët kanë konfirmuar vendosmërinë e tyre për ta mbështetur procesin e normalizimit të marrëdhënieve mes Turqisë dhe Rusisë.
 
Ata kanë theksuar rëndësinë e forcimit të mëtejshëm të marrëdhënieve në të gjitha fushat. Në këtë drejtim, po ashtu është folur edhe për vizitën që kryeministri turk Binali Yıldırım do ta zhvillojë në Moskë më 6 dhjetor dhe mbledhjen e Këshillit të Lartë të Bashkëpunimit Rusi-Turqi.

(er.nu/shqiptarja.com)