RUSI - Kryeministri rus, Vladimir Putin, foli ashpër për Shtetet e Bashkuara të Amerikës, duke i akuzuar se po jetojnë përtej mundësive të tyre “si një parazit” në ekonominë globale. Deklarata e tij ka ardhur pas diskutimeve të ligjvënësve amerikanë për të ngritur tavanin e borxhit.

Putin tha se amerikanët kanë zhvendosur një peshë të problemeve të tyre në ekonominë botërore dhe në një farë mase po jetojnë si parazitë të ekonomisë globale.

Ndërkaq, në një takim të hapur me të rinjtë rus, ai shprehu lehtësim në lidhje me marrëveshjen e borxhit.

"Ekonomia amerikane është një lokomotivë e ekonomisë botërore, ky është një fakt i qartë, dhe në qoftë se atje (në Amerikë) është një sistem që nuk funksionon, kjo do të ndikojë mbi të gjithë ne”, u shpreh kryeministri Putin.

Ai tha se kjo gjendje nuk ka të bëjë vetëm me vende si Rusia dhe Kina, të cilat mbajnë një pjesë të konsiderueshme të rezervave të tyre në letra me vlerë amerikane.

Sipas kryeministrit rus, Vladimir Putin, problemi është se në Amerikë mund të jetë një sistem keqfunksionues që mund të ndikojë ekonominë në tërësi.

Lidhjet ndërmjet Shteteve të Bashkuara të Amerikës dhe Rusisë janë përkeqësuar gjatë qeverisjes presidenciale të Putin, por janë përmirësuar ndjeshëm që nga koha kur presidenti Dmitri Medvedev, iu përgjigj thirrjes amerikane për një përmirësim të marrëdhënieve dypalëshe.

(gm/Shqiptarja.com)