Receta

Qahie shtëpie me vezë dhe djathë nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 15 Shkurt, 12:06 | Përditesimi: 15 Shkurt, 12:08

Qahie shtëpie

Përbërësit:

1 kg miell
2 filxhanë qumësht
3 kokrra vezë
300 gr gjizë ose djathë i thërrmuar
150 gr gjalpë ose 3-4 lugë vaj ulliri
2 lugë gjelle maja buke
Kripë

Përgatitja:

LEXO EDHE:
Melomakarona, biskota me arra dhe mjaltë të sherbetosura nga zonja Albana

Në një gotë me pak ujë të vakur hedhim majanë që të tretet. Më pas, në një enë të madhe vendosim miellin, shtojmë pak vaj ulliri, kripën, qumështin, majanë e tretur dhe i përziejmë të gjitha bashkë derisa brumi të bëhet homogjen. Pasi kemi përgatitur brumin, e mbulojmë me një pecetë kuzhine dhe e lëmë në një vend të errët që të pushojë për rreth 30-40 minuta. Ndërkohë, në një tas rrahim vezët bashkë me gjizën apo djathin e thërrmuar. Më pas, ndajmë brumin në 16 toptha të vegjël, të cilët i hapim në formën e petave me okllai. Vendosim petat në tepsinë e lyer me pak vaj duke spërkatur çdo petë me pak gjalpë të freskët. Pasi të kemi shtruar petën e katërt hedhim një shtresë të hollë të gjizës ose djathit të thërrmuar me vezë. Kështu vijojmë derisa të përfundojmë vendosjen e 16 petëve. E spërkatim në fund me gjalpë dhe e presim në formën e katrorëve të vegjël ose rombit. E vendosim të piqet në furrë të parangrohur në temperaturën 200 gradë Celsius derisa të marrë ngjyrën e kuqërremtë.

MC/Shqiptarja.com

TAG: