Që prej ditës së djeshme pa drita, banorët e fshatrave në Berat: Jemi afro 100 familje që vuajmë mungesën e energjisë elektrike! Ndodh sa herë bie shi dhe fryn erë

Që prej ditës së djeshme, lagjia “Uznovë e Madhe” dhe disa fshatra në Berat janë pa energji elektrike për shkak të motit të keq me erëra të forta dhe reshje shiu.

Burime nga OSHEE Berat bëjnë më dije se në disa fshatra, rrjeti elektrik është shkëputur dhe riparimet që kanë filluar që dje nga elektriçistët nuk kanë përfunduar ende. Banorët janë shprehur se kjo situatë ndodh sa herë që ka stuhi ere si dhe reshje të pandërprera shiu.

“Ky problem vijon prej më shumë se 20 vitesh dhe askush nuk ka marrë masa për riparimin apo zëvendësimin e rrjetit elektrik në këtë zonë. Sa herë që ka reshje dhe erë të fortë, ne rrimë me ditë të tëra pa drita. Jemi ankuar shpesh herë pranë OSHEE-së Berat dhe askush nuk i është përgjigjur shqetësimit tonë.

LEXO EDHE:
Ndërron jetë Mitropoliti i Beratit, Vlorës dhe Kaninës, Imzot Ignati

Na përcjellin me fjalë të ngrohta duke na thënë që do rregullohet dhe nuk bëhet asgjë. Ne këtu jemi afro 100 familje që vuajmë çdo javë mungesën e energjisë elektrike, ndërkohë që në këtë zonë ka edhe shumë biznese që paguajnë rregullisht taksat. Kjo gjendje e rënduar vijon prej shumë vitesh, për shkak se rrjeti energjitik dhe shtyllat elektrike janë të amortizuara”, thonë të tjerë.

Ata deklarojnë se mungesa e energjisë elektrike u ka djegur shpeshherë edhe pajisjet elektro-shtëpiake.

/Sh.Sh/Shqiptarja.com

TAG:
• Berat
• moti i keq