Qendra e Dhurimit të Gjakut
kap 500 raste me hepatit B

TIRANE- Marrëdhëniet seksuale të pambrojtura po çojnë në rritjen e numrit edhe të të prekurve nga hepatitet B e C. Mjekët japin alarmin se ajo që është më shqetësuese është zbulimi i sëmundjes në fazat më të rënduara, për shkak se hepatitet zhvillohen për një kohë të gjatë pa shfaqur simptoma të dukshme.

Vetëm Qendra e Dhurimit të Gjakut ka kthyer mbrapsht mbi 500 persona, duke mos i lejuar ata të japin gjak, pasi rezultuan mbartës të hepatit B. "Nga Qendra e Gjakut janë bërë analiza dhe kanë rezultuar 88 raste me hepatit B, që nuk janë të sëmurë, por janë burim infeksioni për të dhënë të tjerëve. Nga Qendra Kombëtare e Konservimit të Gjakut nga analizat e kryera vetëm në Tiranë janë përjashtuar 592 veta për të mos dhuruar gjak, për të cilët pjesa më e madhe është hepatiti B", - na shpjegon mjeku Halil Stana që ndjek situatën epidemiologjike të Tiranës, pranë drejtorisë së Higjienës së kryeqytetit.

Për të mbajtur nën kontroll këto sëmundje, të cilat, nëse nuk trajtohen në kohë, mund të shoqërohen me pasoja fatale për jetën, këshillohet përdorimi i metodave mbrojtëse gjatë aktivitetit seksual si dhe kryerja e analizave të shpeshta te mjeku specialist, në mënyrë që virusi të zbulohet sa më herët dhe trajtimi mund të jetë më efikas. Kujdes të veçantë në këto raste duhet të tregojnë nënat e reja, që duhet të bëjnë analizat për të verifikuar nëse janë mbartëse të këtyre viruseve, në mënyrë që të mos ua kalojnë sëmundjen bebeve që duan të sjellin në jetë.
(sg/shqiptarja.com)

/Shqiptarja.com