Një orë takim me Ruçin për 3 kushtet e 'Zgjedhores', opozita parlamentare braktis komisionet: Duam takim me Ramën! (VIDEO)

Edmond Stojku, kryetari i grupit 'Demokraci dhe Drejtësi" në Parlament tha se opozita nuk do të marrë pjesë në asnjë komision parlamentar deri sa të zhvillojë takim me të gjithë aktorët që janë pjesë e reformës zgjedhore dhe kërkesat e tyre të merren parasysh.

"I falenderojmë për mikpritjen dhe dakordësinë e të gjitha opsioneve që ne shtruam. Diskutuam për opsionet e Këshillit Politik, kërkesat tona dhe të të shoqërisë civile. Kemi dy elementë të rëndësishëm në këtë reformë, faktorë dhe aktorët. Faktorët duhet të sjellin të gjitha amendimet dhe projektet e tyre për të riformatuar kodin zgjedhor, por aktorët e vetëm që kanë pushtetin e votës jemi ne deputetët e parlamentit. Jemi 39 deputete që jemi dakord për ndryshimin e sistemit zgjedhor dhe për këtë kërkojmë takim me Ramën. Morëm vendimin që opozita parlamentare të mos vazhdojë me mbledhjet e komisioneve parlamentare, pasi nëse nuk takojmë të gjithë aktorët në këtë proces nuk do të jemi në gjendje të japin produktin tonë. Ne kemi ardhur në parlament për popullin shqiptar dhe të ndryshojë këtë politikë 30-vjeçare", tha Stojku.

Kryetari i grupit parlamentar demokrat, Muslim Murrizi tha se janë në pritje të takimit me kryeministrin Edi Rama. Sipas tij, deri në një takim me kryeministrin, tre kryetarët e grupeve parlamentare dhe tre kryetaret e komisioneve parlamentare të opozitës kanë braktisur konferencën e kryetarëve.

"Në takim me Rucin gjetën dakordësinë e plotë që asnjë institucion tjetër jashtë institucioneve kushtetuese që është parlamenti nuk mund të zëvendësojë institucionin legjitim dhe sovran të shqiptarëve, parlamentin shqiptar.  Organe këshilluese në funksion të kuvendit mund të ketë plot të tilla, një nga ata është edhe këshilli politik, që për mendimin tim, kolegët e mi, por edhe e kryetari Ruci ka pushuar dhe ngjarjet do ti kthehen normalitetit. Diskutimet për reformën do të bëhen vetëm në komisionin e reformës zgjedhore. Pas takimit me Rucin ne kemi kërkuar takim me Ramën dhe në respekt të zbatimit të kërkesës tonë, tre kryetaret e grupeve parlamentare dhe tre kryetaret e komisioneve parlamentare të opozitës në konferencën e kryetarëve braktisëm konferencën e kryetarëve për të mbajtur një qëndrim që askush brenda apo jashtë institucioneve legjitime nuk mund të tallet me sovranitetin e votës tonë dhe mandatin e deputetit që ne kemi marrë. Po presim Ramën në respekt që ai të na kthejë përgjigje. Ne nuk mund të rrinim për të vazhduar normalitetin, aq më tepër kur prioritet i parlamentit është reforma zgjedhore dhe jo arnimet për të lënë në fuqi marrëveshjen e 2008. Nuk është tagri im të merren me sharlatanë që kërkojnë të marrin poste. Unë jam deputet dhe nuk do ta votoj arnimin nëse nuk merren parasysh listat e hapura, depolitizimin e administratës dhe votën e emigrantëve", tha Murrizi pas takimit me Ruçin.

Edhe deputeti i opozitës parlamentare, Nimet Musaj tha se nuk do ta votojnë produktin e arritur mes PS-PD-LSI për reformën zgjedhore.

"Ka qenë një takim i ngrohtë me kryetarin e parlamentit. Shprehëm vlerësimin  për mikpritjen që na bëri. Këshilli politik nuk e arriti qëllimin, shqiptarët nuk gjetën atë që ne kërkuam, listat e hapura, depolitizimin dhe votimin e emigrantëve. Nuk kemi bojkotuar konferencën, por së bashku me Murrizin dhe Stojkin, po presim kryeministrin e vendit. Jemi ne që do të votojmë reformën dhe listat e hapura. Nuk do ta votojmë këtë produkt të këtij këshilli. 31 deputetë që na përfaqësojnë ne nuk do ta votojë këtë produkt të këtij këshilli. Ngelemi besim plotë që rekomandimet e OSBE ODIHR të jenë prezent", tha Musai.