Këshilli i Ministrave ka miratuar planin e ri për Parkun Arkeologjik të Apolonisë, duke përditësuar mënyrën e mbrojtjes dhe administrimit të një prej siteve më të rëndësishme arkeologjike në vend.

Lajmin e bëri të ditur ministri i Turizmit, Blendi Gonxhja, i cili tha se me vendimin e miratuar Apolonia shpallet "Pasuri Kulturore e Paluajtshme", në përputhje me kërkesat e ligjit nr. 27/2018 për trashëgiminë kulturore.

Sipas tij, një nga ndryshimet kryesore lidhet me kufijtë e parkut, të cilët janë përditësuar sipas koordinatave zyrtare të përcaktuara nga ASIG. Në këtë mënyrë synohet që kufijtë e zonës së mbrojtur të jenë të përcaktuar sipas standardeve shtetërore.

Plani i ri përcakton më qartë kriteret, procedurat dhe përgjegjësitë e institucioneve për ruajtjen, konservimin, restaurimin dhe administrimin e Parkut Arkeologjik. Në të njëjtën kohë, ai e ndan parkun në zona me nivele të ndryshme mbrojtjeje, bazuar në potencialin arkeologjik të secilës zonë dhe në rezultatet e kërkimeve të kryera ndër vite.

Sipas Gonxhjes, ndryshimet forcojnë bazën ligjore për mbrojtjen e Parkut Arkeologjik të Apolonisë dhe krijojnë rregulla më të qarta për ruajtjen, studimin dhe administrimin e tij, me synimin që siti të vijojë të zhvillohet si një nga destinacionet kryesore të trashëgimisë kulturore dhe turizmit në Shqipëri.

U.D/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 30 Qershor, 22:00

    Pas 30 ditësh, si ju duket fryma që po merr protesta?

Lajme të tjera