QSUT, aksion
për heqjen e kioskave

Drejtoria e Qendrës Spitalore Universitare “Nënë Tereza” së bashku me Policinë Bashkiake ka ndërmarrë gjatë ditës së sotme një aksion për zhbllokimin e hapsirave publike dhe mbylljen e hyrjeve te paligjshme të hapura nga qytetarët apo subjektet përreth QSUT. Aksioni i sotem kishte të bënte me mbylljen e një prej hyrjeve në afërsi të morgut. Po kështu në bashkëpunim me policinë bashkiake është pastruar edhe territori i kësaj qendre spitalore nga të paktën 10 kioska që operonin në mënyrë të paligjshme. “Ka ardhur koha dhe momenti i duhur që në kuadrin e të gjithë reformës që po bëhet në këtë institucion dhe kjo pjesë duhet të shkojë në vendin e vet. Do të thotë portat e paligjshme të cilat afektojnë veprimtarinë e përditshme të punës në këtë institucion, qoftë ky hyrje daljet e personelit apo dhe të të afërmve të pacientëve të cilët them që afektojnë punën çdo ditë në këtë institucion. Sot ato do të mbyllen”, -ka pohuar gjatë fjalës së tij drejtori i QSUT, Saimir Ivziku. Në territorin e QSUT do të ndalet parkimi i automjeteve private, pasi jo në pak raste ato bllokojnë punën e autoambulancave dhe paralizojnë punën në këtë institucion. Masa priten të merren edhe në drejtim të familjarëve të pacientëve, të cilët nuk do të lejohen të hyjnë në pavijone në çdo kohë.