"Nobel", Thaçi: U takon qytetarëve
Daçiç: Për serbët flitej veç në Hagë

PRISHTINE - Pas propozimit që çmimi Nobel për Paqen për vitin 2014 tu jepet, kryeministrave të Kosovës, Hashim Thaçi, të Serbisë, Ivica Daçit dhe Catherinë Ashton, kanë ardhur dhe reagimet e para. Kryeministri i Kosovës, Hashim Thaçi përmes rrjetit social facebook ka folur për nominimin e tij për Çmimin Nobel për Paqe.
 
Thaçi: Nobeli iu takon qytetarëve të Kosovës
“Dje mora lajmin për nominimin për Çmimin Nobel për Paqe nga Kongresi Amerikan. Sigurisht që u ndjeva i nderuar. Dua t’ju flas nga zemra: pavarësisht çka ndodh tutje, Nobelin për Paqe, heroizëm, qëndresë e pjekuri, më shumë se kushdo tjetër, e meritoni Ju, qytetarë të Kosovës”, ka thënë Thaçi.
 
Këtë çmim sipas tij e meritojnë të gjithë ata që kontribuuan çlirimin dhe shtetformimin e vendit.
 
“E meritojnë mësuesit që me vetëmohim hapen shkollat e para, e na mësuan gjuhën dhe historinë tonë. Profesorët e parë të Universitetit të Prishtinës, që çdo ditë ecnin në teh të rrezikut, që krahas dijes na edukuan me atdhedashuri e dinjitet. E meritojnë mjekët, që na shëruan plagët, ushtarët që në altarin e atdheut dhanë jetën për liri duke u bërë dëshmorë të përjetshëm, invalidët e luftës, familjet e dëshmorëve - heronjtë e lirisë së Kosovës, që janë themeli i shtetit tonë të ri”, thuhet më tej në deklaratën e tij.
 
Vendimet e tij politike Thaçi i ka arsyetuar se janë marrë në interes të Kosovës.
 
“Çdo vendim politik që kam marrë në jetë, sado i vështirë e jopopullor të ketë qenë ai në momente të caktuara, e kam marrë duke pasur parasysh interesat e Kosovës dhe të kombit tim. Një shpresë e rilindur, një mundësi më e mirë për të ardhmen e fëmijëve tanë ka qenë dhe mbetet motivi im i vetëm jetësor dhe politik. Besimi i juaj në këtë rrugëtim është vlerësimi më i lartë për mua. Të tjerat kanë më pak rëndësi. Prandaj nominimi për Nobel ju takon juve qytetarë të Kosovës”, ka thënë Thaçi.
 
Daçiç: Nobeli për Paqe? Deri më tani liderët serbë janë nominuar vetëm për në Hagë
 
Nobel për Paqen kryeministrin kosovar, Hashim Thaçi, homologun serb, Ivica Daçiç dhe kryediplomaten e BE, Catherine Ashton, ka reaguar kryeministri serb.
Ai tha se nuk ka shans që të fitojë këtë çmim.
“Deri më tani liderët serbë janë nominuar vetëm për në Hagë,” bëri shaka Daçiç.
 
Treshja që arriti marrëveshjen historike të prillit në Bruksel për normalizimin e marrëdhënieve mes dy vendeve, do të garojë për çmimin që jepet vitin tjetër.
 
Redaksia online
(ac/shqiptarja.com)