E paprecedentë në Shkodër, militantët e PD i bllokojnë ambulancën. Rama: Fajin ua kanë udhëheqësit e verbër (VIDEO)

Axhenda e kryeministrit Edi Rama në veri, nisi me një inspektim të punimeve në sheshin e Bajzës. Në Koplik, militantë të PD-së e pritën me protestë duke bllokuar rrugën. Forcat e policisë, ato të Ndërhyrjes së Shpejtë, neutralizuan militantët duke mundësuar kalimin e eskortës së kreut të qeverisë. Megjithatë, përplasjet mes tyre nuk munguan.

Ura e bllokuar për mbi një orë nga miliantët e PD-së në Bahçallëk të Shkodrës, nuk u shfrytëzua nga kryeministri Edi Rama për të kaluar. Ish-deputeti i PD-së Bardh Spahia tha se kreu i qeverisë kaloi nga një tjetër rrugë dytësore, në kuadër të takimeve që ka këtë të premte në disa zona të kryeqendrës së Veriut. E megjithatë, Spahia tha se kjo ishte një protestës model paqësore. Por në fakt pamjet flasin të kundërtën. Është vetë Spahia që tenton t'i marrë me forcë efektivëve të policisë gomën e makinave që më tej i vunë flakën në mes të rrugës duke bllokuar qarkullimin edhe për mjetet e emergjencës.

"Protestë model paqësore e provokuar nga policia, në tentativë për ti hapur rrugën Edi Ramës,. Është detyruar të kalojë nëpër rrugët dytësore, fshehurazi larg qytetarëve, si një mi", tha ish-deputeti.

Bardh Spahia e quaji një protestë spontane të qytetarëve "të ndershëm të këtij vendi", siç ai u shpreh. Por në fakt sa spontane mund të ishte kjo protestë, kur një ditë më parë, vetë lideri demokrat Lulzim Basha nga Miloti, një nga akset e bllokuara dje në protestën e opozitës së bashkuar, tha se nesër do të protestohej në Shkodër, gjatë vizitës së Ramës.

"Ishte protestë spontane e qytetarëve të ndershëm të këtij vendi", tha ai.

Edhe disa motoristë shqiptarë kanë mbetur të bllokuar në rrugë nga aksioni i opozitës dhe mbështetësve të saj për të bllokuar urën e Bahçallëkut në hyrje të Shkodrës. 

Për këtë situatë, reagoi edhe kryeministri Edi Rama, i cili teksa ndodhej rrugës për në Malësi të Madhe, tha se pak nga pak edhe mbështetësit e paktë të PD-së, do e kuptojnë se fajin ja kanë udhëheqësit e verbër, siç ai i quan.

"Rrugës për Malësi të Madhe. Sinqerisht i keqardhur për grupet e vogla të njerëzve të mbledhur kthesave nga ata që pasi e çuan në qorrsokak PD, orvaten më kot të çojnë në qorrsokak edhe Shqipërinë! Pak nga pak edhe këta njerëz do e kuptojnë se fajin u'a kanë udhëheqësit e verbër", shrkuan Rama. 

Militantët e Partisë Demokratike që këtë mëngjes kanë bllokuar dy akset hyrëse të qytetit të Shkodrës, tek Ura e Bahçallëkut për të penguar kryeministrin Edi Rama për të kryer aktivitetin "Bashkia që duam" në këtë qytet. Por në një akt të paprecedentë ata kanë bllokuar edhe një autoambulancë që do kalonte në rrugë. Fillimisht, militantët i kanë bërë me shenjë ambulancës që të kalojë, por edhe kjo "ftesë" ishte e pamundur të realizohej, pasi mbështetësit e PD-së e kishin bllokuar rrugën me disa goma të cilave i vunë flakën. Por përpos kësaj, në momentin që kanë evidentuar se autoambulanca ishte pa të sëmurë brenda, militantët e kanë bllokuar duke e kthyer mbrapsht.

Militantët e drejtuar nga ish-deputetët Flamur Noka dhe Bardha Spahia, u bënë "mjekë" duke vendosur ata se kur duhet dhe kur nuk duhet një ambulancë të kalojë.

Në fakt, edhe pse ishte pa të sëmurë, ambulanca, për vetë shërbimin që kryen në raste emergjente të qytetarëve që kanë nevojë, duket të jetë e dislokuar pranë spitalit, në gatishmëri për tju përgjigjur urgjencave.

 Edhe ditën e djeshme opozita joparlamentare mbajti protestë kundër qeverisë, që më shumë se sa godet kryeministrin Edi Rama që ata kërkojnë të rrëzojnë, i  bën dëm vetëm qytetarëve të cilët mbetën të bllokuar për më shumë se 1 orë në rrugë. Kjo pasi, opozita, PD, LSI dhe aleatët, ju rikthyen skenareve të bllokimit të akseve kryesore qe lidhin veriun e jugun me kryeqytetin. Njëjtë edhe sot në SHkodër. Për t'i bllokuar rrugën kreut të qeverisë, militantët partiakë bllokuan misionin e ambulancës në shërbim të pacientëve në nevojë për kujdes emergjent mjekësor.