Rama e Tahiri në ambientet e reja
të zjarrfikëses: Rikthyem dinjitetin

TIRANE - Kryeministri Edi Rama dhe Ministri i Brendshëm Saimir Tahiri kanë zgjedhur të inagurojnë stacionin e zjarrfikësve në kryeqytet duke përcjellë dhe një mesazh për sportin me një lojë ping pongu.

Në fjalën e tij kryeministri Rama u shpreh se me infrastrukturën e re stacioni i zjarrfikësve që më parë ishte një vatër zjarri më vete, ka tashmë dinjitetin e nevojshëm për t'i shërbyer qytetarëve.

"Këtë vatër që ishte rrezik zjarri më vete e kemi kthyer në një qendër dinjitoze zjarrëfikësash dhe këtyre njerëzve që në kushtet më të vështira pa asnjë lloj mbështetje logjistike dhe pa asnjë lloj qëndre për të zhvilluar normalisht aktivitetin e tyre të përditshëm, u kemi kthyer jo vetëm kushtet e nevojshme por edhe dinjitetin e nevojshëm." tha Rama

Për Ministrin e Brendshëm shërbimimi i zjarrfikësve është kthyer në një prioritet pasi problemet që qytetarët hasin në një rast zjarri nëse ndërhyhet në kohë shmangin dëme ekonomike dhe ruajnë jetë njerëzish.

"Kjo shënon edhe një pikë kulmore të vëmendjes së qeverisë lidhur me strukturën e repartit të zjarrfikëses për të krijuar një standart të ri në raport me qytetarin në raport me ngjarjet emergjente që kanë të bëjnë me zjarrfikëset." tha Tahiri

Ndërsa shefi i parandalimeve të rreziqeve dhe zjarrit Arjan Ahmetaj deklaron se qytetarët s'duhet të ngurojnë të telefonojnë për çdo emergjencë që ata do të kenë, pasi zjarrfikëset do të ndodhen pranë tyre.

"Në numrin 128 shërbimi jonë është 24 orë dhe do të jetë shumë afër nevojave të qytetarëve." tha Ahmetaj



Redaksia Online
(e.c/shqiptarja.com)