Rama intervistohet nga Grenell, flet për shpalljen 'non grata' të Berishës: Sinjal për mbarimin e pandëshkueshmërisë

Ish-i dërguar i presidentit Trump për dialogun Kosovë-Serbi, Richard Grenell, ka zhvilluar një intervistë me kryeministrin, Edi Rama në median amerikane "Newsmax".

Ndërsa u pyet për vendimin e DASH për shpalljen e ish-kryeministrit Sali Berisha 'non grata', Rama tha se ky është një sinjal që pandëshkueshmëria në vendin tonë po mbaron.

 “Do të thosha se në njërën anë është pikëlluese që ta shohësh këtë realitet, por është sinjal që administratat amerikane vazhdojnë që të jenë zë i reformave në drejtësi. Për mua kjo ishte pak a shumë sikur njoftimi për mbarimin e tranzicionit dhe mbarimin e pandëshkueshmërisë. Askush s’është mbi ligjin”, tha Rama për Berishën.

LEXO EDHE:
Rikthehet 'Parada Shqiptare' më 28 Nëntor në Tiranë! 300 grupe artistike nga Diaspora do të mblidhen në kryeqytetin shqiptar

Po ashtu ai u ndal edhe te mini-Shengeni Ballkanik, ndërsa falënderoi Grenell për kontributin e tij në këtë iniciativë. Ndërsa përmendi konfliktin e Serbi-Kosovë, Rama tha se gjithsesi është e mundur të zhvillohet jetesa pa barriera mes njerëzve dhe mallrave.

“Së pari, më duhet ta përsëris që ju s’jeni më në rolin e kontribuesit të iniciativës së mini-shengenit për të cilin ju falënderoj për rolin tuaj. Në anën tjetër është një konflikt i pazgjidhur shkaku i mosnjohjes së Kosovës nga Serbia. Por është e mundshme që të zhvillohet jetesa pa barriera mes njerëzve dhe mallrave”, u shpreh ai.

E ndërsa Ministrat e Jashtëm të BE nuk vendosën një datë për mbajtjen e Konferencës së Parë Ndërqeveritare me Shqipërinë dhe Maqedoninë e Veriut, Rama u shpreh se është trishtues fakti që të 27 shtetet janë dakord që Shqipëria i ka plotësuar kriteret, por hapje negociatash nuk ka.

“Është trishtuese sepse nga njëra anë thonë që i kemi plotësuar kushtet, dhe nga ana tjetër, KE nuk ka mundësi që të marrë një vendim. Sigurisht që kjo ka të bëjë me disa probleme me Maqedoninë e Veriut dhe Bullgarinë, por sërish për ne është frustruese dhe njëkohësisht tregon shumë sepse gjëja e keqe është që po mësohemi që BE po dështon herë pas here që të mbajë premtimet.", u shpreh Rama.

 

 

INTERVISTA E PLOTË

Takohuni me njeriun kyç që ndihmoi ish-Presidentin Trump të orkestronte një prej shumë historive të suksesit në politikën e jashtme, në këtë rast, bisedimet midis Serbisë dhe Kosovës. Kryeministri shqiptar Edi Rama ka bërë sërish lajm këtë javë e do të bashkohet pas pak me ne. Po shihni Wake Up America vetëm në NewsMax.

Rob Finnerty: Mirëmëngjesi, mirë se erdhët në Wake Up America. Unë jam Rob Finnerty. Kam në krah bashkëprezatuesin tim për këtë javë. Është me ne ish-drejtori i inteligjencës kombëtare dhe ish-ambasador në Gjermani. Ai punoi drejtpërdrejtë për shumë vite me Presidentin Trump për çështjet me jashtë. Ajo administratë ishte sigurisht mjaft e suksesshme, posaçërisht, për ndërmjetësimin e marrëveshjeve të paqes për Izraelin dhe ai sukses u shtri shumë përtej Lindjes së Mesme. Riku ishte atje në emër të Presidentin Trump, si i dërguar i Presidentit për bisedimet midis Serbisë dhe Kosovës. Kyçe për to ishte Shqipëria dhe në zemër të atyre bisedimeve ishte Kryeministri i Shqipërisë Edi Rama, që do të jetë me ne këtë mëngjes nga Tirana. Rik?

Richard Grenell: Faleminderit Rob. Kryeministër, më vjen shumë mirë që të shoh sërish

Edi Rama: Është kënaqësi dhe nder ambasador

Richard Grenell: Dua ta nis menjëherë me diçka. Dje, ju ishit pjesë e lajmeve duke kritikuar dështimin e BE-së me mosmiratimin e çeljes së bisedimeve të anëtarësimit për Shqipërinë dhe Maqedoninë e Veriut. E dimë që kjo është çështje e rëndësishme në Ballkan.  A mund të komentoni mesazhin tuaj  të djeshëm për BE-në?

Edi Rama: Është pak a shumë i njëjti, pasi nga njëra anë, ata vlerësojnë se ne jemi gati të nisim bisedimet formale, duke thirrur Konferencën e parë Ndërqeveritare, nga ana tjetër, Këshilli i BE-së nuk  është në gjendje të marrë një vendim. Kjo ka të bëjë me disa çështje që kanë të bëjnë mes Maqedonisë së Veriut dhe Bullgarisë, por, sërisht, për ne është mjaft zhgënjyese dhe njëkohësisht tregon shumë, për të qenë i sinqertë, pasi e keqja e kësaj është se po mësohemi me faktin që BE-ja po dështon herë pas herë që të mbajë premtimet e veta.

Richard Grenell: Çfarë po ju thonë konkretisht udhëheqësit e BE-së për arsyet pse kanë ngecur këto bisedime për anëtarësimin?

Edi Rama: Ata nuk po thonë asgjë, sepse, siç thashë, kanë bërë vlerësimin dhe secili prej tyre ka vlerësuar që Shqipëria është gati të ulet dhe të nisë bisedimet dhe nga ana tjetër nuk ka vendim sepse BE-ja mbështetet në një mekanizëm vendimmarrës me konsensus të plotë dhe mjafton që njëri prej vendeve të ketë një çështje dhe në këtë rast, çështja është midis Bullgarisë dhe Maqedonisë së Veriut dhe gjithçka hidhet në erë. Është njësoj si të ndjehesh pjesë e një zgjatimi të veprës së Samuel Beckett, “Duke pritur për Godonë” dhe në vend të Vladimirit dhe Estragonit, në këtë libër jemi Shqipëria dhe Maqedonia e Veriut.

Richard Grenell: Shpresoj fort që të arrijmë në një pikë ku udhëheqja amerikane të shtyjë përpara. Ju e dini që administrata e kaluar ka bërë mjaft përparime për normalizimin ekonomik në Ballkan. Një nga idetë e nxjerra nga këto bisedime ishte ideja e zonës së Minishengenit. Çfarë mendoni për këtë ide dhe cili është statusi i saj tani?

Edi Rama: Së pari, ambasador, më duhet të përsëris sot që ju nuk jeni më në atë rol, atë çfarë ju kam thënë kur ishit në atë rol. Ju dhatë një kontribut vërtetë të rëndësishëm, duke treguar me shembull dhe jo me fjalë që është e mundur që edhe pse ndërkohë ka një çështje të madhe dhe të pazgjidhur të njohjes së Kosovës nga Serbia dhe anasjelltas, është e mundur të përmirësohet jeta e njerëzve, është e mundur të punohet së bashku për atë çka, sigurisht qeveritë dhe vendet nuk mund te mos jenë dakord, pra përmirësimi i tregtisë, përmirësimi i bashkëpunimit ekonomik, përmirësimi i lirisë së lëvizjes, së kapitaleve, të shërbimeve e kështu me radhë. Sigurisht që kjo është edhe ajo që nga ana ime e kam nxitur prej vitesh dhe falë shembullit që ju dhatë, u bë edhe më e prekshme. Më duhet të kujtoj këtu, atë çka ju bëtë për të vendosur lirinë e lëvizjes përmes fluturimeve, që ishte e papërfytyrueshme.

Richard Grenell: Aspekt shumë i rëndësishëm i përpjekjes për të siguruar normalizimin në aspektin ekonomik. Dua të pyes në lidhje me njoftimin e fundit të Departamentit të Shtetit për vendosjen e sanksioneve për disa shqiptarë që të hyjnë në SHBA. Çfarë mendoni për këto përcaktime dhe çfarë mendoni për atë që vjen më pas?

Edi Rama: Më duhet të them që nga njëra anë është e trishtë të shohësh këtë realitet që e dimë shumë mirë që ka marrë vulën nga lëvizja e fortë e Departamentit të Shtetit, por nga ana tjetër është sinjal i qartë se përpjekjet e vazhdueshme të qeverisë amerikane, qoftë qeveria, administratës së cilës ju i përkisnit, dhe qoftë qeveria e tanishme, për të nxitur reformën në drejtësi dhe transformimin e sistemit të drejtësisë në Shqipëri ka arritur pikën e moskthimit. Për mua ky ishte mbarimi i tranzicionit dhe i fundit të konceptit të pandëshkueshmërisë. Askush nuk është mbi ligjin.

Richard Grenell: Zoti kryeministër, kemi ardhur në fund. Faleminderit shumë që u bashkuat me ne.

Edi Rama: Faleminderit Ambasador

Richard Grenell: Kryeministri Edi Rama nga Shqipëria.

Edi Rama: Edhe njëherë, është kënaqësi dhe nder. Jeni gjithmonë i mirëpritur në këtë rajon, sidomos në Shqipëri. Presim me padurim t’iu shohim këtu.

Richard Grenell: Faleminderit shumë. Do të kthehemi sërisht.

/r.k./Shqiptarja.com

TAG:
• edi rama
• Tirane
• integrimi ne be
• Richard Grenell
• Minishengeni
• Berisha ne listen e zeze te SHBA