Rama: Kur bëhet fjalë për ekonomi 
i referohem fjalimit të Vaklav Havel

Përpara nisjes për në Beograd ku do të marrë pjesë në samitin ‘Kinë, Europa Qendrore dhe Lindore’ kryeministri shqiptar Edi Rama ka dhënë një prononcim për mediat serbe duke u ndalur posaçërisht tek ekonomia.
 
Duke folur për të përditshmen serbe ‘Blic’, Rama është shprehur se kur bëhet fjalë për çështjet ekonomike i referohet fjalimit të mbajtur nga ish-presidenti çek, Vaklav Havel në Forumin Botëror të Ekonomisë në Davos në vitin 1992.
 
“Ajo që Havel theksoi në fjalimin e tij brilant ishte se nëse ti si lider, kërkon të bësh një ndryshim të vërtetë, duhet të mendosh vlerat e qeverisjes dhe shoqërinë civile. Mbi këto vlera është bazuar edhe programi për rilindjen e Shqipërisë, që solli në pushtet koalicionin tonë në zgjedhjet e qershorit të vitit 2013 me një rezultat historik”, ka thënë Rama për Blic.
 
Themelimi i Këshillit Ekonomik Kombëtar si dhe vendosmëria për të zgjidhur borxhet ekonomike të qeverisë së mëparshme, sipas kryeministrit shqiptar, kanë ndryshuar mjedisin e biznesit në Shqipëri.
 
Më tej Rama ka vënë në pah edhe frytet e punës së qeverisë duke thënë se gjatë vitit të fundit Shqipëria është përmirësuar në renditjen e raportit “Doing Business”, kurse “Standart&Poor’s” ka ndryshuar dy herë parashikimin për Shqipërinë, nga negative në fillim, në neutrale dhe më pas pozitive.
 
Redaksia Online
(Shqiptarja.com)