Në këtë pritje kanë qenë të pranishëm krerë të delegacioneve të huaja në vendin tone dhe përfaqësues të partive politike shqiptare nga Kosova, Maqedonia e Mali i Zi.
“Vetëm dy fjalë mirëseardhje posaçërisht për ata që na kanë ndërruar duke ardhur nga më larg. Falënderoj në mënyrë të posaçme ata që kanë ardhur nga Kosova, Maqedonia, Mali i Zi, përfaqësues të Partive politike shqiptare. Është kënaqësi që ju kemi midis nesh në prag të kongresit. Falënderoj gjithashtu ata që pata kënaqësinë të takoj dhe që janë në themelet e kësaj partie, që i kanë dhënë jetë, dhe kanë pasur një rol kyç për ta rritur, zhvilluar dhe forcuar PS në periudha jo të lehta. Dua të falënderoj të gjithë aleatët e pranishëm këtu në sallë, miqtë e tjerë, dhe shkëlqesitë ambasadore, që na kanë nderuar me praninë e tyre. Zyra e marrëdhënieve me jashtë ishte e shqetësuar se nuk kishte konfirmime por ja ku kanë ardhur të gjithë. I shpreh një falënderim të veçantë, kryeministrit legjendar të Italisë në kohën e përpjekjes së madhe për të çliruar Kosovën, dhe po ashtu presidentit të fondacionit për studimet progresive të partisë socialiste italiane, Massimo D’Alema, i cili na ka nderuar me praninë e tij”, u shpreh kryeministri Rama para të pranishmëve.
Kongresi i Partisë Socialiste, do të mbahet të shtunën në orën 10:00 në Pallatin e Kongreseve.
Në rend dite janë parashikuar 6 pika, të cilat nisur nga ecuria e debatit, nuk përjashtohet dhe të ndryshojnë. Për të drejtuar secilën nga 6 temat e rendit të ditës, përfaqësia e delegatëve do të zgjedhë 6 presidiumet që do të orientojnë debatin ose votimin sipas rastit.
Krahas kryeministrit dhe kreut të PS-së, Edi Rama, kryetari i grupit parlamentar Gramoz Ruçi do të flasë për anëtarësimet e reja në parti, kreu i komisionit të garancive statutore Fatmir Xhafajt do të prezantojë statutin e ri të partisë. Por në punimet e këtij Kongres mësohet se do të flasin pothuajse të gjithë ministrat dhe deputetët.
1500 delegatë janë ftuar të marrin pjesë në Kongresin e Partisë Socialiste nga ku do të votojnë statutin e ri dhe anëtarët e Asamblesë.
Në kongres do të votohet për 175 anëtarët e rinj të asamblesë kombëtare dhe 9 anëtarët e komisionit të garancive statutore.
Ndryshe nga herët e tjera, çdo delegat do të votojë vetëm për anëtarët e qarkut të tij. Delegatët do të përcaktojnë dhe nëse kryesocialisti do të kalojë ose jo në referendum për mandatin e tij, brenda 30 ditëve nga kongresi.
Të drejtën e votës përveç delegatëve të zgjedhur për shkak të zgjedhjeve të brendshme të partisë e kanë dhe 620 të tjerë që e përfitojnë atë për shkak të postit që mbajnë si deputetët, kryetar partie e bashkie dhe ish president.
Ndërkohë të dielën po në Pallat të Kongreseve hapen zgjedhjet për Forumin Rinor Eurosocialit, për strukturat dhe kryetarin.
Redaksia Online
(F.T/shqiptarja.com)