Rama: Mirëpres këdo që do
rënien e Saliut e të Metës

Gjatë pasdites së sotme u zhvillua mbledhja e Asamblesë së zgjeruar të qarkut Durrës. Kreu i PS-së, Edi Rama, ka ftuar të larguarit e të pakënaqurit të bashkohen me PS-në gjatë takimit në Durrës, ku përçarja ka qenë e përhershme.

Dega e PS-së Durrës është një nga degët më problematike për këtë parti, pasi përçarja e socialistëve, e nisur që në vitin 2005 pas humbjes së pushtetit, vazhdon të jetë e madhe.

Rama foli mbi rëndësinë që do të marrë çdo anëtar, por edhe çdo i zgjedhur i PS.

“Do t’i japim një peshë më të madhe anëtarëve të partisë, forumeve dhe jetës së brendshme, për më shumë kohezion dhe pjesëmarrje në vendimmarrje. Asambleja e zgjeruar e qarkut dhe e rrethit janë forume që do t’i vëmë në funksion të plotë. Forume të cilat do të mblidhen sistematikisht” tha Rama.

Edi Rama vlerësoi domosdoshmërinë dhe nevojën e qytetarëve për vendosjen e një demokracie funksionale dhe ftoi të bashkohen me të, cdo person që dëshiron të rrëzoi nga pushteti Berishën dhe Metën.

“Nuk kemi asnjë kusht tjetër për të afruar njerëzit, përveç kushtit që të duan largimin e këtij pushteti dhe vendosjen e një demokracie funksionale. Vend në këtë parti ka për të gjithë. Në kushtet e një regjimi fashist mjafton të jemi të gjithë bashkë. Nuk kemi pse të kemi luhatje. Meta është me Saliun, tek Saliu për Saliun. Jemi në opozitë për ta rrëzuar bashkë me Saliun. Të rrisim anëtarësinë e Partisë Socialiste me 30%, vendim ky që morëm në Kongresin e 5 nëntorit dhe që e kemi pjesë të Programit tonë të ri” u shpreh Rama.