Rama theksoi se mungesa e PD në zgjedhje nuk është fundi, ndërsa tha se është një shans që të gjithë shqiptarët të bëhen bashkë dhe të votojnë PS-në.
"Ju që keni votuar PD-në, ju thoni familjeve, se është ndonjë qamet që s'është PD në këto zgjedhje, por është një shans i madh që të bëhemi të gjithë bashkë.
Mbi partinë është Shqipëria dhe Shqipëria ka sot nevojë për PS-në.
Më e rëndësishme se ç'a do ndodhë më Saliun dhe Lulin, më e rëndësishme është se çfarë do të ndodhë me qytetarët.
Partitë vijnë mbrapa, përpara vjen Shqipëria. Kush e do Shqipërinë, është i mirëseardhur për Shqipërinë që duam", u shpreh Rama.
Kreu i qeverisë theksoi gjithashtu se maxhoranca i do zgjedhjet e 18 qershorit për të vendosur drejtësinë në vend.
Ai tha se opozita ka hyrë në çadër për të mbrojtur gjykatësit dhe prokurorët e korruptuar.
"Ata që janë ngujuar në atë bunker kanë një arsye të thjeshtë. Nuk duan qe ne, populli, socialistë e demokratë, në 18 qershor të pushojmë nga puna prokurorët dhe gjykatësit e korruptuar.
Ata nuk duan që ky popull pas 27 vjetësh nën thundrën e padrejtësisë, nëpër gjykata për pronën, për të drejta elementare të çlirohet më në fund nga kthetrat e gjykatësve dhe prokurorëve që do të jenë të parët që do të përgjigjen përpara ligjit për të gjitha krimet që kanë bërë.
Nuk duan drejtësinë, ndërsa ne i duam zgjedhjet në 18 qershor në radhë të parë për të vendosur më në fund drejtësinë", u shpreh Rama.