Fshati Lin, në brigjet magjike të Liqenit të Ohrit, shpallet 'Ansambël Arkitektonik Urban'!

Kryeministri Edi Rama ka shpërndarë këtë të shtunë disa pamje mahnitëse nga fshati i Linit, Pogradec.

Përmes një postimi në rrjetet sociale kreu i qeverisë vë në pah edhe vendimin e marrë së fundmi, ku Lini është shpallur Ansambël Arkitektonik Urban me vlera të veçanta historike dhe kulturore.

“Mirëmëngjes dhe nga fshati i bukur i Linit që sapo është shpallur “Ansambël Arkitektonik Urban”, duke u përfshirë në zonën shqiptare të Trashëgimisë Botërore të UNESCO-s, ju uroj një fundjavë të mbarë”, shkruan Rama në rrjetet sociale.

LEXO EDHE:
Pas qeverisë, kryeministri Rama mbledh këtë të premte edhe Grupin Parlamentar të PS

Ndërkohë Blendi Gonxhja, Ministri i Turizmit, Kulturës dhe Sportit thotë se ky status i ri vlerëson peizazhin e veçantë natyror që ndërthur trashëgiminë kulturore e natyrore, urbanistikën tradicionale me rrugica kalldrëmi dhe bashkëjetesë komunitare, si dhe arkitekturën vernakulare me teknika e materiale vendase, të përshtatura me klimën dhe resurset lokale.

Fshati Lin ndodhet në brigjet piktoreske të liqenit të Ohrit, rreth 20 kilometra larg qytetit të Pogradecit. Ky fshat i vogël është një nga destinacionet më të veçanta që ndërthur bukurinë natyrore me pasurinë historike.

Një nga thesaret më të çmuara të Linit janë rrënojat e bazilikës paleokristiane, të zbuluara në majën e kodrës që ngrihet mbi fshat.

Zbulimet arkeologjike të realizuara gjatë dekadave të fundit kanë nxjerrë në dritë një kishë të hershme që daton në shekujt V–VI pas Krishtit, e pasur me mozaikë të rrallë, zbukurime gjeometrike dhe simbole kristiane. Mozaikët janë të ruajtur në mënyrë mbresëlënëse, duke dëshmuar për një qendër të rëndësishme shpirtërore dhe kulturore të asaj kohe.

Xh.K/I.M/Shqiptarja.com

TAG:
• edi rama
• pogradec
• fshati lin
• Korce
• Blendi Gonxhja