Gjatë pjesës së hapur për media të mbledhjes së grupit të deputetëve, Rama theksoi se selia blu zgjodhi të dalë në krah të atij që bllokon reformimin e drejtësisë.
“Masës së drejtë të marrë nga Kuvendi për të mos lejuar për 10 ditë atë që bëri thirrje për marrjen e armëve që të jetë pjesë në veprimtarinë e Kuvendit, Pd i është përgjgijur me bojkot 10 ditë, pra me solidaritet të plotë me thirrjen merrni armët që të mbrohemi nga reforma në drejtësi. E gjithë përpjekja për të kriminalizuar çdo gjë që qeveria bën apo ndërton i është shtuar nevoja e brendshme për të penguar me çdo kusht reformën në drejtësi” tha Rama.
Kryeministri u ndal gjatë tek reformat e kryera nga qeverisja socialiste gjatë këtyre 3 viteve dhe tek ekonomia duke folur me shifra konkrete. Ndërkaq ai kishte dhe një mesazh për ata që i quajti “ shakaxhinjtë e rimëkëmbjes” por pa përmendur emra konkretë se cilët ishin ata.
"Asnjë kompani nuk ka ikur nga Shqipëria përveç një kompanie në fushën e naftës dhe arsyeja e largimi tska qenë aspak e lidhur me klimën e biznesit, por ka qenë e lidhru me çmimin e ulët, me një marrëveshje shumë të pafavorshme të vetë kompanisë me një kompani tjetër," u shpreh kryeministri.
Duke u ndalur tek zgjedhjet e partisë , kryeministri pati sërish një falenderim për Namik Doklen që u tërhoq nga gara për kryesinë por jo për Arta Daden, që bëri të njëjtin veprim. Ndërkaq të hënën do të jetë mbledhja e parë e Kryesisë së re.
“Asambleja u zgjodh dhe çdo njësi vendore është e përfaqësuar. Asambleja mbështeti listën e kryesisë. Falenderoj Namik Doklen për dorëheqjen. Puna e kryesisë do nisë javën e ardhshme. Reformat e ndërmarra kanë qenë me rëndësi historike. Përgatitjet me dialogun për Shqipërinë do të nisin në çdo rajon të vendit. Dialogu të nisë nga baza e partisë. Kemi hapur kantierin më të madh të reformave. Kemi nisur punë serioze për të bërë shtet. Reformat janë të dhimbshme, por të domosdoshme” ka thënë Rama.