Rama: Qeveria, pabarazia në themel

TIRANË – Pas publikimit në Shqiptarja.com të vendimit të qeverisë për shpërblimin për zyrtarët me tituj shkencorë ka reaguar kryetari i PS, Edi Rama. Në profilin e tij në Twitter, Rama ka deklaruar se vendimi thellon pabarazinë. Sipas kryesocialistit, titullarët e qeverisë pavarësisht rritjes së të ardhurave paguajnë më pak taksa se pjesa tjetër e popullsisë.
“20-30 mijë lekë më shumë për shkencëtarët ministra,zv.ministra e drejtorë! Do fitojnë më shumë, do paguajnë më pak taksa. Pabarazia në themel!”, shkruan Rama.
Sipas tij, qeveria merr çdo ditë vendime kundër interesit publik dhe të mirës së përbashkët. “Pushtet i vjedhur për t'u bëë hyzmet interesave private të pushtetarëve”, deklaron kryesocialisti.
Partia Socialiste në programin e saj “Për një rilindje kombëtare”, mes të tjerash ka propozuar aplikimin e taksës progressive. Një model ky, i cili, sipas Ramës përdoret nga vendet e Bashkimit Europian dhe SHBA.
“Llotari Kombëtare private! Si askund në Europë ku lekët i merr shteti për kulturën, sportin çështjet sociale. Abuzim i hapur në dëm të shtetit”, komenton Rama lidhur me vendimin e qeverisë për licensën për Llotarinë Kombëtare.

(aq/shqiptarja.com)