Rama shpalos programin: Ja 10
prioritetet e 100 ditëve të para

Kryeministri Edi Rama kërkon ndihmën e qytetarëve për 100 ditët e para të mandatit të dytë qeverisjes, ndërsa ka shpalosur disa prej pikave të programit. 

Përmes një statusi në Facebook të titulluar Si i mendoni 100 ditë te para?, Rama rendit 10 prioritet e qeverisë të 100 ditëve të para të mandatit të ardhshëm siç janë lufta kundër informalitetit, riorganizimi i administratës, aksioni i ujit të pijshëm, pastrimi i territorit, siguria ushqimore, dëgjesat për buxheëtin 2018 apo dhe mbyllja e kapitullit të kultivimit të lëndëve narkotike. 

"Do t'i isha mirënjohës secilit dhe secilës prej jush që do të jepte opinionin e vet, mbi disa ide për operacionet që po përgatiten për 100 ditët para të qeverisë së re. Një pjesë e këtyre operacioneve, shkojnë përtej kufirit të 100 ditëve, por më duket se nisja që ditën e parë të mandatit të ri është kusht për suksesin e tyre. Si mendoni?
​
Çdo kritikë për çka mund të jetë e tepërt apo mund të mungojë në këtë grumbull idesh paraprake, është e mirëpritur🙏", shkruan Rama. 

Reforma në administratë dhe informaliteti
Administrata ishte kryefjalë e fushatës së kryeministrit Edi Rama. Kreu i qeverisë ka premtuar reformë të thellë në zyrat e shtetit, për të spastruar militantët e partive dhe garantuar shërbimin ndaj qytetarëve. Informaliteti në biznese mbetet një betejë e vjetër e qeverisë e cila do vijojë edhe mandatin e ardhshëm. 

Zyrtarët e shtetit, llogari në takime publike
Drejtori i ALUIZNI-t në Berat, Përparim Sinaj u shkarkua nga detyra dy ditë më parë, pasi u akuzua publikisht gjatë një takimi të Ramës me banorët, nga një e moshuar se s'i kishte dhënë lejen e legalizimit të shtesës së shtëpisë. 

Edhe pse qytetares iu dha leja pas ultimatumit të Ramës, Sinaj u shkarkua për mospërmbushje të detyrës. 

Në 100 ditët e para të mandatit të dytë qeverisës, Rama ka paralajmëruar se zyrtarët do japin llogari në takime publike për detyrën e tyre. 

Siguria ushqimore, mjedisi, antikanabisi
Siguria ushqimore, mjedisi dhe zhdukja e fenomenit të kultivimit të kanabisit, janë gjithashtu prioritete të 100 ditëve të para të qeverisë "Rama 2". 

Ndërkaq, prioritete të tjera të qeverisë do jenë edhe aksioni për ujin e pijshëm si dhe fushata e ndërgjegjësimit për rritjen e sigurisë rrugore. 

Postimi i plotë i Ramës në Facebook

SI I MENDONI 100 DITET E PARA?
Do t'i isha mirënjohës secilit dhe secilës prej jush që do të jepte opinionin e vet, mbi disa ide për operacionet që po përgatiten për 100 ditët para të qeverisë së re, si më poshtë:

1. Hapen regjistrimet e anëtarëve të koalicionit të madh "Për Shqipërinë që Duam", në Platformën online të Bashkëqeverisjes me njerëzit e zakonshëm të këtij vendi dhe nis lufta e gjithanshme, kundër parazitëve e grabitqarëve në çdo zyrë të shtetit

2. Nis procesi i llogaridhënies të gjithë drejtuesve të agjencive, inspektoriateve, drejtorive e zyrave të shtetit, në takime publike dhe në prani të anëtarëve të qeverisë së re e të skuadrave të deputetëve të çdo qarku.

3. Fillon lufta kundër shpërdorimit të ujit pijshëm, prerja e lidhjeve të paligjshme, prishja e lavazheve pa leje dhe ndëshkimi i abuzuesve me këtë pasuri të çmuar kombëtare

4. Çelet faza e re e luftës kundër informalitetit në biznes me përshkallëzimin e fuqishëm të presionit ligjor, mbi çdo subjekt të madh e të vogël që nuk operon përmes kuponit tatimor

5. Nis pastrimi rrënjësor i akseve kombëtare nga plehrat, mallrat, tregjet, varrezat e makinave, ferrat, etj., si edhe fillon mbyllja hyrjeve të paligjshme apo të rrezikshme në rrugën kryesore

6. Shpallet një luftë si asnjëherë tjetër kundër ndotjes së mjedisit, hedhjes së mbeturinave jashtë vendeve të përcaktuara dhe organizohet e zhvillohet një aksion kombëtar pastrimi në çdo qytet, fshat e metër katror të Shqipërisë

7. Fillon beteja e gjatë për sigurinë ushqimore në bashkëpunim të ngushtë me qytetarët e angazhuar për Shqipërinë që duam, për të vënë përpara
përgjegjësisë çdo strukturë shtetërore, kompani furnizimi apo subjekt tregtar, që cënon sigurinë e konsumatorit

8. Hapet fushata e re e sigurisë rrugore për rritjen e ndërgjegjësimit të drejtuesve të automjeteve dhe uljen e mëtejshme të numrit të aksidenteve në rrugë 

9. Organizohen në çdo qark dëgjesat publike për buxhetin e vitit 2018, si edhe për riorganizimin e administratës shtetërore, shërbimeve ndaj publikut në çdo bashki dhe projektet e vitit në vijim në rang vendi e qarku. 

10. Mbyllet me fitoren e pakontestueshme të Policisë së Shtetit lufta e këtij viti dhe shpallet fundi i historisë së shëmtuar të kultivimit masiv dhe të paligjshëm të kanabisit në Shqipëri

Siç kuptohet një pjesë e këtyre operacioneve, shkojnë përtej kufirit të 100 ditëve, por më duket se nisja që ditën e parë të mandatit të ri është kusht për suksesin e tyre. Si mendoni?

Çdo kritikë për çka mund të jetë e tepërt apo mund të mungojë në këtë grumbull idesh paraprake, është e mirëpritur🙏". 


(Postimi i Ramës në Facebook)

Redaksia Online
l.q/Shqiptarja.com