Rama: TVSH biznesit të vogël
Riorganizim administratës

Kryeministri Rama nisi nga Fieri diskutimin për buxhetin e vitit 2018, ndërsa deklaroi se biznesi i vogël do të futet në regjimin e TVSH. Kjo sipas Ramës nuk do të thotë se do të futet taksa për biznesin e vogël, por do të pamundësojë, që bizneset e vogla të bëjnë konkurrencë të pandershme duke mos pranuar faturë TVSH.
 
“Do t’i kërkojmë biznesit të vogël të bëhet pjesë e luftës kundër informalitetit. Të gjitha subjektet, edhe subjektet e biznesit të vogël do të përfshihen në TVSH. Nuk është e vërtetë që do të ketë rritje taksash për biznesin e vogël. Ne e kemi bërë zero dhe do të vazhdojë të mbetet zero.
 
Ne do ta përfshijmë në regjimin e TVSH, por kjo nuk do të thotë se do të ketë rritje taksash. Çdo biznes i vogël do të sillet në mënyrë të strukturuar. Kjo do të pamundësojë, që bizneset e vogla të bëjnë konkurrencë të pandershme duke mos pranuar faturë TVSH. Kjo është strategjia. Nuk është rritje taksash” deklaroi Rama” deklaroi ai.
 
Deri tani biznesi i vogël përjashtohej nga detyrimet për faturimin dhe deklarimin e TVSH-së. Bizneset nën 5 mln lekë xhiro në vit, pra të voglat nuk ishin në regjimin e TVSH deri tani.
 
Lufta ndaj korrupsionit, Rama: Jemi në udhëkryq
Rama foli edhe reformën në drejtësi dhe luftën ndaj korrupsionit duke deklaruar se procesi i Vettingut  do të çojë përpara përpjekjen kundër korrupsionit në nivele të larta.
 
“Jemi në udhëkryq sa i takon luftës kundër korrupsionit. Reforma në drejtësi dhe procesi i vettingut do të çojë përpara përpjekjen kundër korrupsionit në nivele të larta.
 
Procesi i Vettingut do të çlirojë njerëzit e zakonshëm nga pesha e padurueshme e korrupsionit në të gjitha instancat e shtetit. Sfidë themelore për të kaluar në një fazë tjetër të marrëdhënieve të shtetit me njerëzit. Riorganizim rrënjësor të administratës.
 
Në Asamble do të shpall ekipin e zv/ ministrave të kësaj qeverie, që ndryshe nga herët e tjera ka kaluar në një proces të hollësishëm përzgjedhje. Riorganizim të brendshëm strukturave të ministrive. Do të vijojë me strukturat e varësisë, me agjencitë, inspektoratet, zyrat dhe sportelet” deklaroi Rama.

Rama: Qytetarët të refuzojnë ata që kërkojnë certifikata
Kryeministri u ka bërë thirrje qytetarëve që të refuzojnë kërkesën e zyrtarëve të shtetit që u kërkojnë certifikata. “Unë u bëj thirrje qytetarëve që ta refuzojnë këtë kërkesë. Çdo zyrë shteti ka detyrë ta nxjerrë certifikatën online. U them njerëzve që çdo zyrtari që thotë ku e ke certifikatën, t’i thotë ndize kompjuteri dhe nxirre ti aty, dhe të mos paguajnë asnjë kokërr leku më dhe të mos dalë nga zyra pa kryer shërbimin në qoftë se nuk kanë certifikatë.
 
Është detyrë e çdo zyre shteti që ta nxjerrë certifikatën nga port @Albania. Është një kërkesë e paligjshme sepse ne e kemi hequr si detyrim. Dhe po kështu janë edhe një sërë dokumentesh të tjera që ua kemi lënë barrë zyrave të shtetit” tha Rama. 

Kryebashkiaku i PD: Na diskriminuat. Edi Rama: Kritikat ishin konstruktive....
Gjatë takimit të Ramës në qarkun e Fierit për buxhetin e 2018, i pranishëm ishte edhe kryebashkiaku i Mallakastrës, Agron Kapllanaj i zgjedhur nga radhët e PD. Ai ngriti shqetësimin para Ramës për mungesë investimesh, ndërsa e cilësoi si diskriminim. Sipas tij bashkia që ai drejton ka marrë vetëm një investim në infrastrukturë, ndërsa shumë rrugë dhe shkolla kanë probleme. Ai u shpreh se kam besim se kërkesat që ka parashtruar do të financohen nga qeveria, pasi nuk i shërbejnë atij, por të gjithë qytetarëve.
 
“Nuk ka asnjë sens për të diskriminuar apo privilegjuar. Do ketë ndryshimin e projekteve dhe fondit që qeveria do të vendosë në dispozicion përtej grantit, që do të jetë 30 mln $ më shumë për bashkitë. E papranueshme që sot pushteti vendor ka shpenzimet më të larta për pagat, jo për investime. Ish-komunat vatra punësimi, por sportele shërbimi.
 
Nuk do të japim asnjë kokërr lekë nëse shkojnë për të shtuar punonjës kot. U kam kritikuar në mënyrë konstruktive të punoni më shumë me projekte. Qeveria do të mbështesë investimet për Mallakastrën” u pergjigj Rama.