Myslimanëve në vendet evropiane vazhdon t’u mohohet mundësia e punësimit dhe e arsimimit për shkak të diskriminimit të gjerë kulturor dhe fetar kundër tyre. Kështu nënvizohet në raportin e publikuar sot nga Amnesty International, i cili shqyrton jetën e myslimanëve në Francë, Belgjikë, Spanjë dhe Holandë.

Marko Perolini, autori i raportit, nënvizon se opinioni i përgjithshëm në shumë vende evropiane është se "myslimanët janë në rregull për aq kohë sa ata nuk janë shumë të dukshëm."

Në raport theksohet se personat që mbajnë veshje specifike fetare si, shamitë në kokë, apo simbole të tjera të lidhura me islamin, kanë më pak sukses në gjetjen e punës për shkak të paragjykimeve nga pjesa tjetër e shoqërisë evropiane.

Amnesty International iu ka bërë thirrje qeverive europaine që të zbatojnë ligjet ekzistuese të Bashkimit Evropian kundër diskriminimit dhe të sfidojnë stereotipet negative myslimane.
(jd/shqiptarja.com)