Raporti i DASH, Tahiri: Do nxjerrim
vendin nga harta e trafikimit

TIRANE- Pas publikimit të raportit të Departamentit Amerikan të Shtetit për trafikimin e personave në Shqipëri, dhe lajmit të mirë që rezulton nga ky raport se Shqipëria tashmë ka dalë nga “Lista e vëzhgimit të grupit” kanë ardhur edhe vlerësimet nga qeveria shqiptare. Në një deklaratë për mediat, ministri i Brendshëm Saimir Tahiri thekson se qeveria shqiptare ka përmbushur tashmë një nga premtimet e bëra lidhur me reduktimin e fenomenit të trafikimit të qenieve njerëzore. Ndërsa shtoi se ka ende punë për të bërë në këtë drejtim. Duke u shprehur se qeveria e kaluar e kishte zhytur vendin në listën e vendeve në vëzhgim sa i përket këtij fenomeni, ministri Tahiri tha se ngjitja e Shqipërisë në grupin 2 është një lajm i mirë.
 
“Qeveria e kaluar e zbriti Shqipërinë në listën e vendeve në zhvillim, apo akoma më keq të zhytura në kriza të rënda. Madje nuk bëhej përpjekje për të luftuar trafikimin e qenieve njerëzore. DASH vlerësoi se kemi treguar vullnet të palëkundur për të lëvizur nga gjendja ku ishim dhe për t’u renditur në vendin e dytë. Kjo tregon se ka ende shumë për të bërë, por tregon se qeveria aktuale po vijon përpjekjet për eliminimin e këtij fenomeni.
 
Në 2013 janë vetëm 2 të dënuarit për këto vepra penale, për të treguar se drejtësia ka ende shumë për të bërë. Dalja nga lista e vendeve në vëzhgim ishte një angazhim i qeverisë, dhe ky tregon për një tjetër premtim të mbajtur në 100 ditë qeverisje.
 
Një punë kolosale kurorëzoi qeverinë në ngritjen në vendin e dytë në këtë drejtim. Jemi të vendosur për ta nxjerrë vendin nga harta e vendeve të shënjestruara për trafikun e qenieve njerëzore”, tha ministri Tahiri.
 
Ndërsa Elona Gjebrea tha se “raporti i DASH vlerëson hapat që qeveria ka ndërmarrë për ta nxjerrë vendin nga lista e vendeve në vëzhgim. Në raport vlerësohet rikthimi në funksioni i mekanizmit të antitrafikut. Po kështu vlerësohet përmirësimi i legjislacionit, dhe hapat e ndërmarra deri më tani”.
 
Redaksia Online
(e.s/shqiptarja.com)