Raporti i KLSH: Albpetrol e OST
dëm ekonomik 55 mln USD

TIRANE- Një dëm shumë i madh ekonomik i është shkaktuar shtetit shqiptar nga dy ndërmarrje të saj, ende të paprivatizuara. Në analizën vjetore të KLSH, u zbulua se Albpetrol ka dëmtuar taksapaguesit në masën 4 miliardë lekë dhe OST në masën 2 miliardë lekë.

Dy ndërmarrjet më të madha, ku ende është pronar shteti, kanë dëmtuar interesat e taksapaguesve shqiptarë në masën gjashtë miliardë lekë, ose 55 milionë dollarë amerikanë. Këtë e ka zbuluar Kontrolli i Lartë i Shtetit në veprimtarinë e tij gjatë vitit të kaluar, ku janë konstatuar në total mbi 7 miliardë lekë shkelje, shpërdorime e abuzime me fondet e buxhetit.

Në Pallatin e Kongreseve është zhvilluar dje, në praninë e medias, analiza e punës për vitin 2011 e strukturave të KLSH. Duke folur me cilësinë e kreut të këtij institucioni, kryetari i porsaemëruar nga Kuvendi, Bujar Leskaj, theksoi, veç të tjerash, se "pavarësia dhe integriteti i institucionit duhet të na bëjë të ndërgjegjshëm se korrupsioni nuk ka ngjyrë, nuk është as i kuq, as blu, por është i zi".

Pjesa më e madhe e dëmit të evidentuar është kryer nga Operatori i Sistemit të Trasmetimit të Energjisë Sh.a. Tiranë, në vlerën 1.924.209.000 lekë, si moslikujdim i shërbimit të kryer për transmetimin e energjisë elektrike për periudhën nga privatizimi i OSSH deri më 15.12.2010 dhe në Albpetrol sh.a. Fier, në vlerën 3.936.800.000 lekë, shkaktuar nga moslikujdimi i detyrimeve prej 3.6 miliardë lekësh të rrjedhura nga furnizimi me naftë bruto, gaz natyror dhe hollues deri më datë 31.12.2010 nga kompania ARMO sha.a (ARMO Oil) dhe 358 mijë lekë nga moslikujdimi në afat i faturave të shitjes së naftës po nga kjo kompani, pra gjithsej 5.86 miliardë lekë.

Leskaj theksoi me shqetësim faktin se niveli i realizimit të rekomandimeve të KLSH për shpërblimin e dëmit të konstatuar në organet tatimore dhe doganore ka një përqindje mjaft të ulët (vetëm 9 për qind), ose, nga 183 milionë lekë rekomanduar për shpërblim të dëmit, janë nxjerrë urdhërat përkatës për vetëm 16 milionë lekë.