Reagon Basha: Cani kurban i Ramës
Ahmetaj i besuari i bandës plaçkitëse

TIRANE - Lideri i opozitës Lulzim Basha e ka pritur me lumë akuzash shkarkimin e ministrit të Financave Shkëlqim Cani dhe zëvendësimin e tij nga kreu i dikasterit të Ekonomisë Arben Ahmetaj. Në një deklaratë të shpërndarë për mediat pas këtij vendimi të kryeministrit Rama, Basha akuzon Ahmetaj si të besuarin e kreut të qeverisë për të vjedhur paratë e shqiptarëve. 

Sipas Bashës, Shkëlqim Cani është bërë "kurban" i Ramës për të mbuluar vjedhjen e 400 milionë dollarëve në Tatime dhe në Dogana. 

Akuzat e tij vijojnë edhe ndaj zëvendësministres së Shëndetësisë Milva Ekonomi, e cila do të emërohet në vend të Ahmetajt si ministre e Ekonomisë. Sipas krydemokratit, Ekonomi është e përfshirë në koncesionet korruptive në shëndetësi. 

E për të sjellë ndryshimin në vend, alternativa e demokratëve mbeten zgjedhjet e parakohshme. "Ndryshimi i vërtetë nis me largimin e Edi Ramës dhe bandës së tij plaçkitëse", shkruan Basha.

Deklarata e plote e Bashes
Edhe pse lufta ndaj korrupsionit është një prioritet absolut sic e vuri në dukje edhe Sekretari amerikan i Shtetit, Edi Rama mbetet i vendosur në promovimin e vjedhjes dhe hajdutërisë.

Pasi bëri kurban Shkëlqim Canin për të mbuluar vjedhjen e 400 milionë dollarëve në tatime dhe dogana, me caktimin e Arben Ahmetajt si ministër financash, Rama konfirmoi se plaçkitja, zhvajtja, mbushja e xhepave me paratë e shqiptarëve, janë standartet e tij të qeverisjes.

Ahmetaj është ndër më të besuarit e bandës plaçkitëse të Edi Ramës. Ai ka feksur me landfillin e Elbasanit nga ku vidhen 10 mijë euro para publike në ditë, dhe ka shkëlqyer si ndërmjetësi i pazarit të fshehtë, të paligjshëm dhe korruptiv për mega-aferën Skavica.

Rama dekoroi sot dhe modelin e koncesioneve korruptive në shëndetësi, një prej vjedhjeve më të mëdha në historinë e vendit ku u ndanë mbi 338 milionë euro me miqtë dhe klientët e tij. Si zv.ministre e Shëndetësisë zonja Konomi ka qenë një punëtore e palodhur në këtë skemë të madhe zhvatje. Për këtë kontribut ajo shpërblehet nga Rama duke u emëruar Ministre e Ekonomisë.

Mesazhi i Ramës është i qartë. Vidh, bëhesh deputet dhe ministër. Vidh më shumë, Edi Rama të beson financat, të beson ekonominë e vendit.

Këto arnime korruptive pasqyrojnë vetëm interesat financiare të Edi Ramës. Ato do ta thellojnë edhe më tej rekordin e vjedhjes, varfërinë dhe krizën që janë produktet e vetme të kësaj qeverie. Ndryshimi i vërtetë nis me largimin e Edi Ramës dhe bandës së tij plaçkitëse.
​ 
Redaksia Online
(Gre.M/Shqiptarja.com)