Reflekton Rama,krijon Ministrinë
për Europën dhe Punët e Jashtme

Kryeministri Edi Rama ka reflektuar pas kritikave nga opozita dhe deklaratës nga ambasadorja e BE për shkrirjen e Ministrisë së Integrimit.
 
Burime për Shqiptarja.com nga Presidenca pohojnë se në dekretet që Rama ka dërguar në zyrën e Metës ka një ndryshim në emërtimin e Ministrisë së Jashtme.
 
“Ministria për Europën dhe Punët e Jashtme”, kështu do të quhet ministrja që do të drejtojë Ditmir Bushati, pas shkrirjes së ‘Integrimit’ me Ministrinë e Jashtme.

Këtë ndryshim Kryeministri e ka pranuar edhe gjatë një interviste televizive.

“Ministria e Integrimit ka qenë shumë e nevojshme  në këtë fazë dhe në fazën ku hyjmë puna e saj, pra puna e bërë deri më tani nga kjo ministri duhet shpërndarë në shumë më tepër shpatulla, me shumë më tepër barrë përgjegjësie dhe ministria e Jashtme, e cila do të quhet ministria për Europën dhe Punët e Jashtme, do të ketë përgjegjësinë e drejtimit", ka thënë Rama.
 
Vendimi i Ramës për ndryshimin e emërtimit erdhi edhe pas deklaratës së ambasadores së BE në Tiranë, Romana Vlahutin pak ditë.
 
Ndërkohë që dje Rama zhvilloi një takim me ambasadorët e SHBA dhe të BE për më shumë se një orë në Kryeministri.
 
Tashmë emërtimi i ri mbyll debatin për praninë e termit ‘Europë’ në përbërjen e qeverisë së re.
 
Ndërsa nesër do të konstituohet Kuvendi, ditën e hënë do të shkojnë dekretet për qeverinë e re.


dy.b/shqiptarja.com