Reforma në administratë, Braçe: Dembelët dhe të korruptuarit të ikin vetë, s'ka tolerime

Një administratë publike e vogël, që kushton pak dhe krejtësisht funksionale ka qenë fokusi kryesor i takimit të zv. kryeministrit Erion Braçe me grupin e Posaçëm për Reformën në Administratën Publike. Në fjalën e tij, zv. kryeministri tha se të korruptuarit, të paaftët dhe emërimet partiake nuk do të tolerohen më në administratë. Merita, edukimi, profesionalizmi e përvoja dhe konkurrenca përmes tyre, do të jenë pikat kyçe që do ndikojnë në procesin e rektrurimit të një punonjësi të ri.

"Pastërtia e figurës së nëpunësit të administratës publike, posaçërisht në raport me ligjin dhe veprimet në përputhje me ligjin të cilitdo dhe kudo. Vlerësimin e punës përmes objektivave konkrete e të matshëm çdo muaj, në përputhje me kontratën e performancës së gjithsecilit dhe natyrisht dhe objektivat politike të çdo zyre të shtetit. Qëndrueshmërinë përmes mbrojtjes ligjore nga ndikimet e kohëpaskohshme politike apo dhe më keq, partiake. Ndershmërinë profesionale e të shërbimit, përkundrejt qytetarëve, garantuar nga transparenca dhe posaçërisht nga kundërveprimi ligjor ndaj çdo akti të korrupsionit, praktikave të ryshfetit, klientelizmit dhe në fund fare edhe përfitimeve në mënyrë të paligjshme", tha Braçe teksa po tregonte kriteret për punësimin në administratë.

Ai u ka bërë një thirrje të gjithë punonjësve aktual të regjistruar në shtet, të bëjnë një analizë të punës së tyre dhe në rast se nuk do të ecin me ritmin që duhet, nuk do të tolerohen.

Gjithashtu, të pranishëm në këtë takim ishin përfaqësuesi i lartë i  Komisionit Europian, Georg Ziegler, Zëvendës drejtor i njësisë për Shqipërinë, Bosnje dhe Hercegovinën, pranë Komisionit Europian, ambasadori Delegacionit të BE-së në Shqipëri, Soreca dhe ministra të kabinetit qeveritar që mbulojnë fushat raportuese dhe përfaqësues të institucioneve dhe agjencive të përfshira në këtë proces, përfaqësues të shoqërisë civile.

B.K./Shqiptarja.com

TAG:
• reforma ne administrate
• Erion Braçe