Rekrutimet në SHISH, shumica
i kërkon “llogari” Visho Ajazit

TIRANE - Veç raportimit, një tjetër shqetësim që është ngritur në Kuvend nga mazhoranca, përkatësisht në Komisionin e Sigurisë, ka të bëjë me rekrutimet që janë bërë nga kreu i Shërbimit Informativ Shtetëror, Visho Ajazi Lika në këtë institucion.
 
Ka qenë deputeti i PS, Xhemal Qefalia, që ka depozituar në sekretariatin e Kuvendit kërkesën për seancë dëgjimore me kreun e SHISH në lidhje me emërimet jashtë çdo kriteri të punësimeve në këtë institucion, por jo vetëm.
 
Ky shqetësim ka ardhur pas investigime që janë bërë në lidhje me punësimet që ka bërë kreu i SHISH në këtë institucion pas marrjes së detyrës së tij që në gusht të 2012, ku u zgjodh pas propozimit të ish-kryeministrit Sali Berisha.
 
Rezulton se një pjesë e mirë e punonjësve të SHIK-ut të kohës së Gazidedes janë rikthyer në detyra të rëndësishme. Në disa raste konstatohen edhe emërime në poste drejtuese, ndonëse në kohën kur i kanë ndërprerë marrëdhëniet kanë qenë vetëm punonjës të thjeshtë.
 
Së dyti, punonjës të dikastereve të tjera të emëruar në kundërshtim me statusin e punonjësve të SHISH pranë këtij të fundit, por edhe punonjës të mbetur nga vitet ‘92-‘97 janë promovuar me ndryshimet e fundit, në pozicione drejtuese.
 
Ndonëse kreu i institucionit, gjatë raportimit me dyer të mbyllura në Kuvend në muajin dhjetor, u shpreh i kënaqur me qeverinë për buxhetin që ishte akorduar, kjo nuk do të shërbejë aspak si shenjë e mirë në marrëdhëniet e tyre. Pas nismës për shkarkimin e kryeinspektores së ILDKP, Zana Xhuka, pritet që e njëjta nismë të ndërmerret edhe për kreun e SHISH.
 
Redaksia online
(ac/shqiptarja.com)

TAG:
• visho ajazi lika