Situata me pandeminë sa vjen e po rëndohet në Kosovë, duke shtuar kështu numrin e rasteve me fatalitet dhe duke rritur numrin e të shtruarve në spitale. 17 viktima si pasojë e Covid-19 u shënuan vetëm gjatë 24 orëve të fundit, ndërsa numri i pacientëve që po kërkojnë trajtim nga Covid-19 nëpër spitale tashmë është rritur shumë. Mbi 20 mijë raste aktive me virusin Corona janë në Kosovë, njofton Instituti i Shëndetit Publik. Sipas një raporti të Shërbimit Spitalor Klinik Universitar të Kosovës, në spitale janë të shtrirë 929 pacientë, prej tyre 723 të konfirmuar me virusin Corona. 35 pacientë janë në gjendje të rënduar shëndetësore, ndërkaq 688 po trajtohen me oksigjeno-terapi.
Sipas drejtorit të SHSKUK-së, Valbon Krasniqi, nga 929 pacientët e shtruar, rreth 105 prej tyre kanë marrë një apo dy doza të vaksinës. "Numri i pacientëve të shtrirë të vaksinuar, me numrin e atyre që janë të pavaksinuar, është i vogël. Edhe nëse infektohen të vaksinuarit, gjasat janë shumë të vogla të shtrohen në spital, por edhe nëse kanë nevojë për hospitalizim, gjasat për të kaluar më lehtë janë më të mëdha”, njoftoi Krasniqi.
Ndërpriten disa shërbime spitalore jourgjente
Të ndodhur para kësaj situate të rënduar me pandeminë dhe rritjes së numrit të pacientëve, Shërbimi Spitalor Klinik Universitar i Kosovës ka ndërprerë disa shërbime spitalore jourgjente në sallat kirurgjike, ku kryhen interventimet. Drejtori i SHSKUK-së, Valbon Krasniqi bën të ditur për mediet lokale, se përveç pushimit të dhënies së disa shërbimeve mjekësore jourgjente, janë ndërprerë edhe pushimet vjetore të stafit shëndetësor dhe janë urdhëruar të kthehen në punë. "Jemi detyruar të ndërpresim pushimet dhe ju kërkoj mirëkuptim edhe qytetarëve edhe pacientëve për këto reduktime në shërbime të tjera, por kjo është situatë e imponuar dhe jemi të shtrënguar të marrim vendime të tilla”, tha Valbon Krasniqi.
Autoritetet shëndetësore ndërkohë u kanë bërë thirrje qytetarëve që të respektojnë masat kundër COVID -19, siç është mbajtja e maskave, mbajtja e distancës dhe mbajtja e higjienës. Nga 20 gushti qeveria e Kosovës vendosi që të reduktohen pothuaj të gjitha aktivitetet publike deri në masën e mbylljes së plotë siҫ janë klubet e natës dhe ahengjet familjare. Përdorimi i maskave është i detyrueshëm në të gjitha ambientet e mbyllura publike. "Teatrot, bibliotekat, orkestrat, galeritë, ansamblet, baleti, kinematë, qendrat rinore, muzetë, qendrat e kulturës me grupe apo institucionet e tjera të ngjashme vartëse të MKRS-së apo të Komunave, lejohen të punojnë duke shfrytëzuar 50% të hapësirës/sipërfaqeve të objekteve përkatëse për të gjitha aktivitetet”, thuhet në njoftimin e qeverisë.
Po ashtu të gjithë qytetarët, të cilët hyjnë në Republikën e Kosovës, përfshirë edhe ata me leje qëndrimi të përkohshëm ose të përhershëm në Kosovë dhe të cilët vijnë nga vendet me rrezik të lartë sipas listës zyrtare të Institutit Kombëtar të Shëndetësisë Publike të Kosovës (IKShPK), duhet të kenë test RT-PCR negativ për COVID-19 të bërë në 72 orët e fundit.
Ende ka hezitim për vaksinimin
Qendrat e vaksinimit po punojnë me kapacitet të plotë, por në masë akoma ka hezitim për vaksinim, ndonëse fushatat informuese nuk mungojnë. Imunizimi i qytetarëve kundër COVID-19 po vazhdon të bëhet në 30 komuna me mbi 300 ekipe të vaksinimit. Sipas njoftimit të IKSHPK-së, deri më 23 gusht, Kosova ka administruar mbi 714 mijë vaksina. Kurse të vaksinuar plotësisht janë mbi 239 mijë persona.
Instituti Kombëtar i Shëndetësisë Publike të Kosovës (IKSHPK) ka apeluar te qytetarët e Kosovës, që të vaksinohen, pasi varianti Delta i virusit Corona po përhapet me shpejtësi dhe rritjen rapide të rasteve pozitive me këtë virus. "Deltavarianti po vazhdon të përhapet me shpejtësi në Kosovë! Virusi bartet shumë shpejt prej një personi në dhjetëra persona tjerë me pasoja që në të shumtën e rasteve mund të jenë fatale e që fatkeqësisht preken edhe fëmijët! Rastet pozitive me SARS CoV-2 janë në rritje në mënyrë rapide me variantin Delta i cili është dominant! Masat rigoroze të ndërmarra dhe zbatimi i tyre duhet të bëhet nga çdo qytetar i Republikës. Bashkë me masat tashmë të njohura: mbajtja e maskave, mbajtja e distancës dhe mbajtja e higjienës, do të arrijnë efektin e vet ne uljen e lakores, ju lutemi të besoni se masa më efikase në luftë kundër COVID-19 është VAKSINIMI!”, thuhet në apelin e IKSHPK drejtuar qytetarëve.
Për mbikqyrjen e zbatimit të masave kundër COVID-19 pos policisë së Kosovës angazhohet edhe Agjencia e Ushqimit dhe Veterinarisë e Kosovës (AVUK). Kjo agjenci në fokus ka mbikqyrjen e masave, siç është orari i punës nga lokalet e gastronomisë, mbajtjen e ahengjeve, grumbullimin e njerëzve, distancën e tavolinave e të tjerave, por numri i vogël i inspektorëve sipas zyrtarëve të AVUK-ut e ka bërë të vështirë kontrollin gjithandej./ DW
Lajme të tjera
-
Serbia i refuzon ministrit të Brendshëm të Kosovës kërkesën për vizitë në Luginën e Preshevës
25 Dhjetor, 13:52 -
Osmani: Lista Serbe është angazhuar në akte terroriste dhe akte agresioni
24 Dhjetor, 19:57 -
Kosovë, Lista Serbe paralajmëron se do të ankimojë vendimin e KQZ-së
24 Dhjetor, 18:01 -
Kurti: Sulmin në kanalin e Ibër-Lepencit e urdhëroi Radoiçiçi, Serbia e financoi! Para dhe pas vitit të ri mund të ketë sulme terroriste në Kosovë
24 Dhjetor, 17:45 -
Gucati përfundon dënimin në Hagë: Qëndrova ballëlartë dhe krenar
24 Dhjetor, 16:51 -
Kosova dhe Shqipëria me ekipe të përbashkëta hetimore, Dumani dhe Isufaj firmosin marrëveshjen
24 Dhjetor, 12:52 -
Lista serbe jashtë zgjedhjeve, ndërkombëtarët: Veprim politik! Vuçiç: Kurti po eleminon të vetmin kundërshtar
24 Dhjetor, 12:16
-
Ambasadori britanik në Kosovë reagon pasi nuk u certifikua Lista Srpska: Procesi të zhvillohet mbi bazën ligjore, jo të interesave politike
24 Dhjetor, 10:34 -
Perëndimi shpreh shqetësim për moscertifikimin e Listës Serbe
23 Dhjetor, 21:32 -
Kosovë/ 100 eurot për fëmijë dhe pensionistë, fushatë zgjedhore apo ndihmesë?
23 Dhjetor, 18:47 -
Kosovë/ Kurti lë jashtë zgjedhjeve Listën Serbe, anëtarët e Vetëvendosjes votojnë kundër, KQZ nuk certifikon pjesëmarrjen
23 Dhjetor, 15:47 -
Kosovë/ Policia sekuestron një sasi të madhe të armëve të ftohta në Prishtinë
23 Dhjetor, 14:10
