Renzi: Europa shkoi në planetin
Mars, por dështoi me emigrantët

Kryeministri italian, Matteo Renzi, shkruan në faqen e tij zyrtare në internet, se Europa duket e hutuar përballë krizës së emigrantëve, pavarësisht potencialit të madh që disponon.

Në përmbledhjen javore të zhvillimeve politike brenda dhe jashtë vendit, Renzi ndalet veçanërisht te kriza e emigrantëve, ndërsa shënimin e tij e titullon "Dy fytyrat e Europës".

Ai thotë se Europa ka zbritur ndërkohë misionin e saj hapësinor në planetin Mars, tregues i një kapaciteti të jashtëzakonshëm, por nga ana tjetër, sipas tij, përballë sfidës së emigrantëve, duket se ka humbur, teksa e ilustron me një foto nga emigrantët në Idomeni të Greqisë.      
 
"Ndërsa Europa ka shkuar në Mars, ne nuk duhet të harrojmë se çfarë po ndodh çdo ditë në pjesë të ndryshme të kontinentit, nga Calais, Francë, në Idomeni, Greqi. Çdo ditë ne si italianë punojmë për një Europë të përqendruar në vlerat njerëzore dhe jo vetëm në parametrat ekonomike. Ne duam të arrijmë një marrëveshje me Turqinë, por jo me çmimin e heqjes dorë të vlerat që e karakterizojnë Evropën. Ne duam një reagim të unifikuar të Europës, dhe jo ngritje të mureve", thekson kryeministri italian, Renzi.
 
Nga ana tjetër, edhe pas humbjes së zgjedhjeve lokale në 2 prej 3 landeve, kancelarja gjermane, Angela Merkel, deklaron se nuk do të ndryshojë politikën e saj ndaj emigrantëve.

Teksa është kritikuar për hapjen e dyerve për të huajt, gjë që po sjell edhe kosto elektorale për të, një zëdhënës i Merkel shprehet se "Qeveria gjermane po vazhdon politikën e saj për refugjatët, me të gjitha forcat, brenda dhe jashtë vendit".
 
Ndërkohë, të enjten pritet të mblidhet në një takim të jashtëzakonshëm Këshilli i Europës, për të trajtuar krizën e emigrantëve. 

Redaksia online
Shqiptarja.com