Mure të rëna, xhama të thyer, karrige dhe banka të shkatërruara. Kjo ishte pamja e shkollës 9-vjeçare “Neim Babameto” në Durrës më 26 nëntor. 1 vit më pas nxënësit, e gjejnë gjithçka të ringritur,

Leonik Tomeo,  drejtor i këtij institucioni arsimor, tregon për Report Tv rrugëtimin e vështirë të të bërit mësim, deri në ndërtimin e godinës së re.

 “Ajo ditë për ne ka qënë shumë e rëndë, e përjetuam keq në kuptimnin e dëmtimit si godinë që në orët e para të datës 26 ne ishim këtu. Por, nga ana tjetër them mirë që ishte pa nxënës në shkollë sepse do ishte berë katastrofë më e madhe. Nga data 26 nëntor dhe në vazhdim ne kemi zhvilluar mësim në kushte mjaft të vështira në shkolla të tjera, në kushte jo shumë të favorshme. Por jemi jashtëzakoisht të kënaqur, e mendonim që shkolla do të ndërtohej por jo kaq shpejt. Shkolla ekzistuese ka qënë me dy turne, momentalisht është vetëm në një turn dhe nuk kemi asnjëë problem që të shtyhet mësimi apo të bëhet me dy turne. Duke patur parasysh, vec ambienteve ka, ngrohje, ndriçimi etj”, thotë drejtori i shkollës, Leonik Tomeo.

Për nxënësit, ishte thuajse e pabesueshme që të uleshin sërish në bankat e shkollës së tyre kaq shpejt.

“Shkolla pësoi një dëmtim të madh, nuk ma mori mendja jo vetën mua por edhe të tjerëve që shkolla do të ndërtohej kaq shpejt. Ne  benim mësim në shkolla të tjera të alternuar me online, ndërsa tani zhvillojmë mësim cdo ditë”, thotë një nxënës.                                   

“Shkolla më duket shumë e përshtatshme, më pëlqen shumë”, shprehet një tjetër.

Kjo shkollë ka kapacitet prej 28 klasash, ndërsa marrin dije 800 nxënës,ndërsa në Durrës deri më tani janë rindërtuar 3 shkolla.