TIRANË - Përveç urimeve për qeverinë e re nuk ka munguar edhe një shënim në Facebook, i deputetit të PS-së, Alfred Peza, pak para se kryeministri Edi Rama bashkë me ministrat e tij të hynin në selinë e qeverisë.

“Më në fund, sot më 15 shtator 2013 qeveria e koalicionit PS- LSI, ka filluar zyrtarisht punën. Isha pak para mbledhjes së parë të qeverisë, në zyrën e re të Edi Ramës. Në atë zyrë, nga ku sot doli pas 8 vjetësh si Kryeministër, Sali Berisha. Dukej që sapo ishte zbrazur nga dokumentet dhe mjetet e tjera të punës së përditshme”, shkruan Peza në profilin e tij në Facebook.

E profesioni i gazetarit, duke se e ka ndihmuar deputetin e PS-së, të bëjë një pëshkrim të situatës në selinë e kryeministrisë.

“Kryetari socialist m’u duk i emocionuar, kur nën vëzhgimin e pandërprerë të kamerave dhe bliceve të aparateve fotografike që punojnë për arkivin zyrtare, vizitoi pothuajse të gjitha ambientet e katit të dytë të godinës së qeverisë së Shqipërisë. Për një çast, Rama hodhi vështrimin nga ajo dritare, ku kamerat e kanë fiksuar Sali Berishën të hapi perden e zyrës së tij, gjatë protestës së 21 janarit, ku mbetën të vrarë 4 qytetarë të pafajshëm”, shkruan Peza.

“Më pas, u rikthye nga korridori i gjatë nga ku erdhi, për të hyrë në sallën e re të mbledhjeve të qeverisë. Ku po e prisnin ministrat që sapo ishin betuar me dorën mbi Kushtetutë, përpara Presidentit Bujar Nishani. Dera u mbyll dhe mbledhja filloi. Në korridor takova Tan Lamen dhe Tan Shkrelin që janë marrë me arredimin e sallës së mbledhjeve të qeverisë së re. Zbrita shkallët dhe dola në bulevard. Njerëzit, sapo ishin shpërndarë pas fjalës së Kryeministri Edi Rama, që mbajti përpara godinës së qeverisë së re në prani të të gjithë ministrave të kabinetit të tij. Unë isha aty, kur sot filloi një etapë e re e historisë së Shqipërisë”, përfundon shënimin e tij të shkurtër deputeti socialist, Alfred Peza, pak minuta para se qeveria e drejtuar kryeministri Edi Rama, të zinte vendet në sallën e mbledhjeve të qeverisë.
 
Redaksia online
(ac/shqiptarja.com)