Përballja e parë e Bashës me kritikët! Kryedemokrati mbledh të dielën Kryesinë dhe Këshillin Kombëtar të PD për zgjedhjet e 25 prillit

Kreu i PD, Lulzim Basha do të mbledhë këtë të diel Kryesinë dhe Këshillin Kombëtar të partisë, takim që vjen pas kontestimit të rezultatit të zgjedhjeve në 9 qarqe.  Mbledhja me anëtarët e Kryesisë do të zhvillohet në orën  17:00, në selinë blu, ndërsa dy orë më pas kryedemokrati Basha do të takojë edhe anëtarët e Këshillit Kombëtar.

Është zbardhur edhe mesazhi që sekretari i Përgjithshëm i PD-së, Gamzent Bardhi i ka drejtuar anëtarëve të Kryesisë, ku bëhet me dije se në rend të ditës do të jenë diskutimet  dhe vendimet që do të merren pas situatës së krijuar me atë që PD e konsideron "masakër elektorale"

"Të nderuar anëtarë të Kryesisë!

LEXO EDHE:
4 akuza, Adriana Kalaja padit familjarisht Lulzim Bashën! Kallëzon në SPAK edhe Aurela Bashën e Erion Isufin

Ditën e dielë, datë 16 Maj 2021, ora 17:00, do të zhvillohet mbledhje e Kryesisë së Partisë, me rend ditë: “Diskutime dhe vendimmarrje sipas Statutit për proceset politike pas situatës së krijuar me masakrën elektorale të zgjedhjeve të 25 Prillit”.

Më pas, në orën 19:00, me të njëjtin rend dite, do të zhvillohet mbledhja e Këshillit Kombëtar.

Mbledhjet do të zhvillohet në selinë e Partisë, në sallën e Grupit Parlamentar, Kati i II.

Ju lutem merrni masat për pjesëmarrjen tuaj!", shkruhet në mesazhin e Bardhit.

Në takimin e së dielës pritet të ketë debate pasi do të jetë edhe përballja e parë e Bashës me kritikët e tij, ish-Presidentin Bujat Nishanin dhe anëtarin e Kryesisë, Fatbardh Kadillin. Kujtojmë se që pas humbjes së zgjedhjeve nga ana e Partisë Demokratike, drejtues të rëndësishëm të strukturave të kësaj force politike, kanë kërkuar me ngulm largimin e Bashës nga drejtimi i partisë. I pari që e kërkoi dorëheqjen e Bashës  ishte Kadilli, më pas ish presidenti Bujar Nishani dhe Arben Ristani. Më pas kërkesa për largimin e Bashës u pasua nga një numër shumë i madh demokratësh të tjerë.  

Basha iu përgjigj sot kritikëve të tij, ku nga Lezha tha se mirëpret kritikat brenda PD ndërsa theksoi se do të ketë zgjedhje për kryetarin e kësaj partie, duke iu referuar zgjedhjeve në korrik që kjo parti do të mbajë. Ata që janë "lodhur" nga beteja kundër Ramës, Basha i konsideroi "skllevër" të këtij të fundit.

PD ka ankimuar rezultatin e 25 prillit në qarkun e Gjirokastrës, si edhe në 8 qarqe të tjera me argumentin e PS-ja ka blerë masivisht votat nga individë me rekorde kriminale, se ka dhënë leje legalizimesh , ndihma ekonomike, pagesa për tërmetin për vota në favor të socialistëve. Surprizë në kërkesën e tyre ishte se nuk kërkonin rinumërim të votave, por direkt rivotim në këto qarqe, përveç atyre ku dolën fitues.

TAG:
• lulzim basha
• PD
• Bujar Nishani
• Fatbardh Kadilli
• zgjedhjet parlamentare 2021
• Lufta brenda PD
• Ankime per 25 prillin