Statusi i deputeti të PD, Eduard Halimi
“Vendimi i gjykatës kushtetuese për shfuqizimin e ligjit të byrosë kombëtare të hetimit, është një vendim drejtësie. Sot Gjykata Kushtetuese pranoi kërkesën e Partisë Demokratike për shfuqizimin si antikushtetues të ligjit për krijimin e Byrosë Kombëtare të Hetimit, që “de facto” caktonte Kryeministrin si kryehetues dhe Kryeprokuror në vend. Përshëndes vendimin e kësaj Gjykate, e cila pavarësisht presioneve te kryeministrit, qëndroi në anën e parimeve e standardeve ndërkombëtare. Vendimi i sotëm i Gjykatës Kushtetuese frenon një Kryeministër autoritar dhe delirant që vepron në mënyrë arbitrare e mendon se qëndron mbi ligjet dhe Kushtetutën. Krijimi i Byrosë Kombëtare të Hetimit si një strukturë hetimore nën drejtimin direkt të kryeministrit ishte një përpjekje për shkatërrimin e shtetit ligjor, të drejtave dhe lirive të qytetarëve, njëlloj si burgosja masive e tyre dhe shkatërrimi arbitrar i pronave te ligjshme pa asnjë letër, me dorën kryeministrore”, shkruan Halimi. Deputeti demokrat më tej shprehet se shqiptarët po largohen nga Shqipëria pasi qeveria po i detyron të largohen pasi nuk gëzojnë liritë dhe pronat e tyre. “Kjo qeverisje po detyron shqiptarët që të largohen nga vendi dhe të kërkojnë azil në vendet e BE, sepse kanë humbur të drejtat e tyre për të gëzuar liritë dhe pronat e tyre, po humbin gjakun dhe djersën e tyre në vite, dhe po humbin shpresën. Përshëndes ekipin që ka ndjekur këtë çështje në Gjykatën Kushtetuese, si dhe vetë Gjykatën për vendimin e sotëm, që padyshim i jep shpresë qytetarëve shqiptare se kryeministri autoritarist mund të ndalet dhe se institucionet e pavarura mund të funksionojnë në Shqipëri”, shkon më tej deputeti i PDsë. Shqipëria është e shqiptarëve dhe ato duhet të qëndrojnë këtu për t’i thënë ndal të keqes dhe të ligës që përhapet ditaditës”. Ai thekson se më 21 qershor është radha e shqiptarëve ti thonë ndal autoritarizmit të kryeministrit. “Gjykata Kushtetuese foli sot. Më 21 qershor është radha e shqiptarëve që të flasin dhe që njëzëri ti thonë ndal autoritarizmit dhe arbitraritetit te Kryeministrit”, përfundon Halimi në reagimin e tij.
Redaksia Online
(g.f/Shqiptarja.com)