Rrëzohet kushti i parë i PD
për Komisionet Hetimore

Komisioni për Çështjet Ligjore rrëzoi dje projektligjin “Për disa shtesa dhe ndryshime në ligjin nr. 8891, datë 02.05.2016 “Për organizimin dhe funksionimin e komisioneve hetimore të Kuvendit”, që përbënte një nga tre kushtet e opozitës për rikthimin e saj normal në jetën parlamentare. Projektligji ishte nismë e deputetëve të grupit parlamentar të Partisë Demokratike. Halimi theksoi se projektligji i paraqitur nga Partia Demokratike, nuk ka asnjë shkelje kushtetuese. “A bie ndesh projektligji i propozuar nga Partia Demokratike me ndonjë nen të Kushtetutës? Përgjigja është jo.

Nëse ka ndonjë kundërshti ky ligj, është zero, përputhej totale. Pika tre e nenit 77 thotë se Komisionet e hetimit veprojnë sipas procedurës me ligj. Çfarë ka ligji? Ligji ka një problem. Problemi që ka ligji ka të bëj me abuzimin që përbën mazhoranca për të mos lejuar pakicën të hetojë mazhorancën.  Shqyrtimi i projektligjit “Për disa shtesa dhe ndryshime në ligjin nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”,- tha Halimi.

Por bashkërelatori i projektligjit, Ulsi Manja nënvizoi se projektligji i propozuar nga Partia Demokratike ka shkelje të rënda të Kushtetutës duke i kërkuar komisioni për ta rrëzuar këtë projektligji. “Këto ndryshime synojnë të zhbëjnë tërësisht kuadrin kushtetues dhe ligjor të veprimtarisë normale të parlamentit. Argumentet e servirur në relacionin që bashkëshoqërojnë ndryshimet nuk kanë argumentet të natyrës kushtetuese, kështu që në këto kushte, unë do t’ju kërkoj kolegëve që ti propozojmë seancës plenare rrëzimin e këtij projektligji pasi bien ndesh me normat e kushtetutës por edhe të ligjit për komisionet hetimore”,- tha Manja.

Kryetari i Komisionit, Fatmir Xhafaj tha se nuk ka asnjë praktikë të ngjashme si propozimi i grupit parlamentar të PD-së. “Kërkesa e opozitës është një deformim substancial i sistemit parlamentar i marrëdhënieve shumicë pakice, i mënyrës se si funksionojnë organet kolegjiale. Edhe nga pikëpamja e funksionimit të organeve administrative. Ne nuk jemi i vetmi vend që kemi Komisione Hetimore të parashikuara në Kushtetutë dhe në ligj, e kemi të huazuar këtë.

Më gjeni një praktikë të ngjashme si kjo që kërkoni që ju që ta votojë ky parlament”,- tha Xhafaj. Në fund komisioni rrëzoi në parim projektligjin e propozuar nga Partia Demokratike duke i sugjeruar seancës plenare rrëzimin e nismës ligjore. Projektligji tjetër i sjellë nga opozita për ndryshime në ligjin e dekriminalizimit, kusht i dytë i PD-së, u shty për në mbledhjen e sotme. Burime nga mazhoranca bëjnë me dije për Shqiptarja.com se do të rrëzohen ditën e sotme.
 
Halimi:
“Ligji, projektligji, nuk bie ndesh me asnjë nen, me asnjë paragraf, me asnjë nënparagraf, me asnjë germë të Kushtetutës. Neni 77/2 që u citua shpesh këtu, i jep të drejtë opozitës që të ngrejë komisione hetimore”.

Xhafaj:
“Meqenëse këtu u përmend marrëveshja e famshme e 24 dhjetorit, pavarësisht edhe nga mënyra e njëanshme se si u citua dhe u nënvizua, një gjë u tha se si ti bëjmë komisionet hetimore më efiçente”.