Rriten pagat për katër
kategori në SHISH

TIRANE- Qeveria në ikje dhe kryeministri i saj Sali Berisha, me rritjen e pagave nuk ka harruar të shpërblejë edhe strukturat e Shërbimit Informativ Shtetëror.
 
Prej 15 korrikut të këtij vitit, paga minimale e një informatori të thjeshtë në SHISH do të jetë 22.000 lekë e deri në 126.000 lekë për Inspektorin e Përgjithshëm të këtij shërbimi.
 
Në fakt rritja e pagave përfshin të katra kategoritë në strukturën e Shërbimit Informativ Shtetëror, ku veç pagës, 1 % mbi të shtohet për vjetërsi pune dhe nga 2 deri në 20 % shtesë për çdo gradë të fituar sipas karrierave personale.
 
Vendimi është marrë më datë 17 korrik të këtij viti, ndërsa efektet financiare të tij fillojnë nga 15 korriku dhe e gjithë barra financiare do të përballohet nga buxheti i shtetit.
 
Kjo shtesë pagash vjen pas plot 6 vitesh pasi në strukturat e mëparshme dhe pagat e marra deri tani rezulton se për herë të fundit kjo strukturë ka funksionuar sipas vendimit të qeverisë të marrë më 13 korrik të vitit 2007.
 
Qeveria në ikje ka patur plot përplasje me SHISH deri në momentin që u ndryshua kreu i saj, dhe me pëlqimin e kryeministrit Berisha, në drejtimin e këtij institucioni u vendos Visho Ajazi.


(Foto: Vendimi i qeverisë për rritjen e pagave të punonjësve të SHISH)

Redaksia Online
(e.s/shqiptarja.com)

/Shqiptarja.com

TAG:
• visho ajazi lika