Rrjedhja e informacionit, Visho Ajazi
“sekuestron” telefonat e SHIK-save

TIRANE- Pas publikimit të lajmit se kreu i SHISH ka përgjuar disa persona të rëndësishëm si kryetarin e Komisionit të Sigurisë Spartak Braho, drejtoreshën e Doganave, Elisa Spiropali etj, drejtuesi i këtij institucioni Visho Ajazi Lika ka lëshuar një qarkore të brendshme ku i ndalon të gjithë punonjësit e SHISH që të përdorin telefona celularë. Sipas “Top Channel” qarkorja e lëshuar nga Visho Ajazi është bërë në mënyrë elektronike në sistemin e brendshëm të institucionit, ku u kërkon që të gjithë punonjësve, që të dorëzojnë telefonat e tyre celularw në kasafortën e institucionit ndërsa telefonat e zyrës t’i mbajnë sipër tavolinës së sekretarëve të drejtorëve dhe të punonjësve sa herë bie zilja.

Por lëshimi i kësaj qarkoreje me kaq urgjencë përbën edhe një precedent të pandodhur më parë në këtë institucion, pasi agjentët nuk komunikojnë dot me terrenin dhe shpjegohet me frikën që ka mbërthyer drejtuesit e SHISH pas rrjedhjes se urdhrave që kanë shkaktuar polemika të forta për menaxhim politik të shërbimit. Ky urdhër i iniciuar nga Visho Ajazi përfshin edhe inspektoren e kryeministrit në SHISH Suela Bedeni. Për këtë urdhër të fundit burimi është njoftuar menjëherë, kryeministri Edi Rama sikurse edhe kreu komisionit parlamentar të Sigurisë Spartak Braho. Kontaktuar prej “Top Channel”, Braho tha se është në dijeni të qarkores të cilën e quajti si një situatë jo normale.

“Pas rrjedhjes së informacioneve nga ky institucion gjë për të cilën drejtuesit e SHISH kanë përgjegjësi, s’kanë përse ta kërkojnë tek media, por tek vetja. Ata janë mbërthyer nga sindroma e dyshimit dhe e frikës ndaj kujtdo pjesëtari të përfshirë aty si punonjës legal, për të zbuluar armiqtë e mundshëm që nxjerrin jo vetëm të ashtuquajturat sekrete por edhe veprimet e paligjshme të drejtuesve të SHISH”, ka theksuar kryetari i Komisionit të Sigurisë.

Shkrimi u publikua sot (12.03.2014) në gazetën Shqiptarja.com (print)

Redaksia Online
(d.d/shqiptarja.com)

TAG:
• visho ajazi lika