GRAMSH - Ka nisur puna për ndërtimin e rrugës zëvendësuese Banjë-Gramsh-Ura e Trashovicës.
 
Ministri I Transporteve,Edmond Haxhinasto dhe ai i Energjetikës Damian Gjiknuri kanë inauguruar gjatë ditës së sotme nisjen e punimeve të investimit që pritet të zgjasë 12 muaj dhe do të zgjidhë problemin e përmbytjes së rrugës ekzistuese nga lumi Devoll.
 
Sipas Gjikunurit kjo rrugë pritet të ketë impakt pozitiv në zhvillimin e zonës së bramshit, ndërsa Haxhinasto teksa pohoi se punimet do finalizohen në kohë rekord, theksoi se do punësohen rreth 600 banorë të zonës.
 
“Pas miratimit që i bëri parlamenti marrëveshjes, bëhet i mundur fillimi i punimeve për këtë rrugë dhe ky rreth bëhet përfundimisht me një rrugë moderne, me një rrugë brenda të gjitha standardeve e cila do të jetë një nyje lidhëse mes Gramshit dhe Elbasanit. Projekti do të vazhdojë edhe në lidhjen e rrethit të Gramshit me Korçën, pra në zonën e Moglicës dhe më tutje. Me pak investime në të ardhmen edhe nga qeveria shqiptare do të bëhet e mundur që gjithë kjo trevë të ketë një lidhje të dyfishtë, pra edhe me Elbasanin, edhe me Korçën”, u shpreh ministri Gjiknuri.
 
Ministri i Transportit dhe Infrastrukturës Edmond Haxhinasto shprehu vlerësimim për  bashkepunimin me kompaninë Devoll Hydropower, për gadishmërinë e saj për realizimin e kësaj vepre dhe për standartet e larta që do të zbatohen për realizimin e saj. 
 
“Një zhvillim shumë i rëndësishëm në realizimin e kësaj vepre është se në projekt dhe në realizimin e saj, do të kemi një lidhje organike me të gjithë komunat dhe fshatrat përgjatë kësaj rruge, pra do të jetë një rrugë që i shërben komuniteteve. Shumë e rëndësishme është gjithashtu që në realizimin e kësaj vepre do të angazhohen rreth 600 punonjës, që do të jetë një kontribut i drejtpërdrejtë për zhvillimin e zonës dhe për aktivitetin ekonomik, për të ardhurat e familjeve të kësaj zone”, nënvizoi Haxhinasto.
 
Projekti parashikon një rrugë me një gjatësi prej 15.3 km, nga e cila 11.7 km është gjurmë tërësisht e re dhe 3.6 km gjatësi ndjek rrugën ekzistuese. Projekti parashikon ndërtimin e 13 urave të cilat në total kanë një gjatësi 1685 ml.
 
Të gjitha fshatrat që ndodhen përgjatë këtij aksi është parashikuar që të lidhen  me infrastrukturën zevëndësuese përmes rrugëve të aksesit që lidhin çdo fshat me rrugën kryesore. Këto rrugë aksesi janë të parashikuara në projekt së bashku me çdo element përkatës sinjalistike. Vlera e ndërtimit të kësaj rruge është 33 milion Euro dhe parashikohet të përfundojë në Shkurt 2016.
 
Redaksia Online
(a.h/shqiptarja.com)