Serbi, zyrtari i SHBA: Rusia po
imponon ndikimin e saj në Ballkan

BEOGRAD - Një zyrtar i lartë i SHBA deklaroi të mërkurën se Shtetet e Bashkuara dëshirojnë të ndihmojnë në zgjidhjen e problemeve në Ballkanin Perëndimor, një rajon të trazuar evropian ku Rusia tenton të rrisë ndikimin e saj.

"Shohim një dritare të mrekullueshme për të gjithë ne," tha në kryeqytetin serb, Wess Mitchell, Ndihmës Sekretari i Shtetit për Çështjet Evropiane dhe Euroaziatike. "Një dritare e mundësisë për të bërë progres, zgjidh çështjet që e kanë mbajtur Ballkanin Perëndimor mbrapa për një kohë të gjatë".

Përpara se të shkonte në Serbi, Mitchell vizitoi Maqedoninë dhe Kosovën. Maqedonia ndodhet në një mosmarrëveshje për emrin me Greqinë fqinje, ndërsa Serbia ka refuzuar të njohë shpalljen e pavarësisë së Kosovës.

Këto dhe mosmarrëveshje të tjera kanë penguar stabilizimin e plotë të Ballkanit pas viteve të krizës dhe luftrave të viteve 1990. Frika e paqëndrueshmërisë së ripërtërirë është nxitur nga interesat e Rusisë në rajon, veçanërisht në Serbi.

Mitchell u kërkoi vendeve të Ballkanit të shfrytëzojnë mundësinë për të zgjidhur mosmarrëveshjet e mbetura me ndihmën e perëndimit, duke përfshirë angazhimin e Bashkimit Evropian për të pranuar anëtarë të rinj nga rajoni në të ardhmen.

"Kjo është një punë për të gjithë ne", tha Mitchell pas bisedimeve me presidentin e Serbisë Aleksandar Vuçiq. "Tani është koha të punojmë së bashku për t'i zgjidhur këto probleme për të mirën e gjeneratave të ardhshme".

Vuçiç bëri thirrje për një kompromis në arritjen e një marrëveshjeje me Kosovën, marrëveshjeje e cila është një kusht kyç për anëtarësimin përfundimtar të vendit të tij në BE.

Shtetet e Bashkuara dhe shumica e shteteve të BE kanë njohur pavarësinë e Kosovës, ndërsa Rusia ka mbështetur Beogradin në refuzimin e saj për ta bërë këtë, duke ruajtur një ndikim të fortë në Serbi pavarësisht ofertës së shpallur nga BE.

Mitchell tha se "Shtetet e Bashkuara dëshirojnë të ndihmojnë në gjetjen e një zgjidhjeje për të mirën e përbashkët në lidhje me Kosovën".

"Ne jemi të gatshëm të dëgjojmë, të ndihmojmë dhe të jemi kreativ", tha ai.

 

d.gj/ Shqiptarja.com

/Shqiptarja.com