Ka qenë ky mesazhi i përcjellë nga komisioneri për zgjerimin në Bashkimin Europian, Johannes Hahn kreut të diplomacisë serbe, Ivica Daçiç gjatë një konference për shtyp. “Serbia duhet të vijojë me reformat e kërkuara nga Bashkimi Europian. Duhet të vijojë edhe procesi i normalizimit të marrëdhënieve me Kosovës”, tha Hahn në takimin me Daçiç.
Ndërsa ky i fundit përsëriti angazhimin e qartë të Serbisë në rrugën evropiane, forcimin e bashkëpunimit rajonal dhe marrëdhënieve të mira fqinjësore, përfshirë këtu normalizimin e marrëdhënieve me Kosovën dhe zbatimin e marrëveshjeve të arritura në dialogun në mes të Beogradit dhe Prishtinës.
“Anëtarësimi i Serbisë në BE nuk është një qëllim në vetvete, por ne shohim integrimin evropian, në radhë të parë si një mjet për të nxitur reformat dhe modernizimin në të gjitha fushat e shoqërisë dhe shtetit”, tha Dacic.
Dy zyrtarët u takuan në Bruksel në një konferencë në lidhje me strategjinë e BE për rajonin Adriatik-Jon. Ky takim vjen pak ditë përpara vizitës së komisionerit Hahn në Serbi dhe Mal të Zi më 20 dhe 21 nëntor 2014.
Redaksia Online
(shqiptarja.com)
